маориф
ДДЗТ: донишҷӯ - барандаи стипендияи ба номи Ломоносов
Ин ҳафта Фотима Эгамназарова, донишҷӯи факултаи филологияи руси Донишкадаи давлатии забонҳои ба номи Сотим Улуғзода, зимни ширкат дар Озмуни байналмилалӣ оид ба фанҳои гуманитарӣ, ки аз тариқи Интернет сурат гирифт, барандаи стипендияи ба номи Ломоносов гашт. Ва муҳассили шӯъбаи забони ҷопонии факултаи забонҳои Шарқ Шаҳноза Кӯчбоева дар озмуни ҷумҳуриявии санъати наттоқии забони ҷопонӣ ғолиб омада, барои ширкат дар Озмуни 14-уми Осиёи Марказӣ роҳхат гирифт. Ин духтарон ба донишкада тибқи квотаи президентӣ дохил шудаанд.
Бино ба иттилои Файз Турсунов, ноиби ректори донишкадаи мазкур, дар нишасти матбуотӣ таълимгоҳ дар ҳалли мушкили сатҳи пасти донишандӯзии ҳамаи донишҷӯён, аз ҷумла онҳое, ки тибқи квота мехонанд, муваффақ аст.
Сабаби комёбии донишкадаро дар бахши таълим ноиби ректор аз фароҳам будани шароити хуби омӯзиш, яъне мавҷудияти китобхонаи замонавӣ бо теъдоди беш аз 80 ҳазор нусха адабиёти дарсӣ ва инчунин китобхонаи электронии фарогири 85 ҳазор нусха адабиёти дарсии муосири кишварҳои дигари ҷаҳон арзёбӣ намуд.
Омили дигар, ба андешаи ӯ, муваффақ гаштан ба ҳалли мушкили таҷрибаомӯзии донишҷӯён аст. Азбаски таҷрибаомӯзӣ дар ташкилоту муассисаҳо натиҷаи хуб надод, давоми ду соли охир дар ин самт ҳар кафедра барномаҳои мушаххасро таҳия ва роҳандозӣ намудааст.
Инчунин ба онҳо устодони соҳибзабон аз кишварҳои Ҷопон, Миср, Чин, Кореяи Ҷанубӣ, Британияи Кабир ва ИМА сабақ медиҳанд. Ва айни замон 60 донишҷӯ дар мактабҳои олии ҷумҳуриҳои Чин, Мисри Араб, Кореяи Ҷанубӣ ва Русия таҳсил мекунад.
Хайринисои Расулӣ
Баёни ақида (0) Санаи нашр: №: Мутолиа карданд: 5607
