ТАСС. Тоҷикистон  ният дорад, ки дар чаҳорчӯби Созмони  Аҳдномаи амнияти дастаҷамъӣ (СААД) ба Қазоқистон барои рафъи хатари бамиёномада кумак расонад. Дар ин бора дар баёнияе, ки рӯзи панҷшанбе дар  сомонаи расмии Вазорати  корҳои хориҷии Тоҷикистон мунташир шуд, омадааст. 

Дар матн зикр мегардад, ки Тоҷикистон дар партави дӯстии чандинасра ва принсипи шарикии стратегӣ дар талоши Қазоқистон барои барқарории сулҳу оромӣ дар кишвар пуштибонӣ мекунад. Вазорати корҳои хориҷӣ дар баёния гуфтааст, ки Тоҷикистон аз ҳаводиси Қазоқистони бародар изҳори нигаронӣ дорад. "Мо чун роҳбарияти Қазоқистон аз вазъи ноороми кишвар дар ташвишем ва мутмаинем, ки он ҳарчи зудтар ором хоҳад гашт",- гуфта мешавад дар матн.

 

Расонаҳо дар бораи вазъи ороми  пойтахти Қазоқистон хабар доданд

INTERFAX.RU. Вазъият дар пойтахти Қазоқистон шаҳри Нур-Султон ором аст, аммо ҳанӯз дар он афсарони пулис ва техникаҳои низомӣ зиёданд,- хабар медиҳад шабакаи  телевизионии «Хабар 24».

"Мисли як рӯзи одист, нақлиёти ҷамъиятӣ, мошинҳо ҳаракат мекунанд, мо ягон чизи махсусро мушоҳида накардем, ба ҷуз ин ки дар атрофи шаҳр пулис ва низомиён зиёданд", - гуфт хабарнигори телевизион. 

Илова бар ин, «Хабар 24» бо такя ба мақомоти маҳаллӣ хабар дод, ки фурудгоҳи Ақтоба аз дасти ҷинояткорон озод шудааст. "Ҳукумати вилояти Ҷамбул, бахши  минтақавии ҳизби Nur Otan ва шуъбаи корҳои дохилии шаҳри Тараз дифоъ шуда,  ҳукумати Семей аз  қувваҳои тахрибкор озод гардид", - омадааст дар  иттилои ӯ.  

 

СААД аз гардиши вазъи Қазоқистон ба сӯйи беҳбудӣ хабар дод

Лента.ру. Дабири кулли СААД Станислав Зас ба АИР «Новости» иттилоъ дод, ки воқеаҳои рӯзи охир аз беҳбуди вазъ дар Қазоқистон шаҳодат медиҳанд.

Вай  шарҳ дод, ки чунин хулосаи эхтиёткоронаро аз рӯи воқеаҳое, ки дар рӯзҳои охир ба амал омадаанд, баровардан мумкин аст. "Мо умедворем, ки ин тамоюл тақвият хоҳад ёфт",- гуфт ӯ. 

Дар ҳамин ҳол, Зас зикр кард, ки ҳарчанд неруҳои қудратии  Қазоқистон мустақилона  аз иҷрои барқарор сохтани тартибот бароянд ҳам, неруҳои посдори сулҳи СААД бояд ба онҳо кумак расонанд. 

Қаблан Зас ваъда дода буд, ки неруҳои посдори сулҳ дар пароканда кардани тазоҳуротгарон дар Қазоқистон ширкат намекунанд. 

 

СҶТ аз ҳадди аксари сироятёфтагони COVID-19 дар ҷаҳон дар як рӯз хабар дод

ТАСС. Дар 24 соати охир дар ҷаҳон беш аз 2,6 миллион нафар мубталоён ба коронавирус ба қайд гирифта шуданд, ки ин баландтарин суръати сироятёбӣ тайи як шабонарӯз  дар тамоми давраи пандемия мебошад. Ин маълумотро Созмони ҷаҳонии  тандурустӣ  нашр кардааст.

Тибқи иттилои Созмони ҷаҳонии тандурустӣ, то 6-уми январ 296 496 809 мубтало ва 5 462 631 фавтида ба қайд гирифта шудааст.   

 

Дабири кулли СААД бо Лукашенко ва Токаев дар бораи вазъи кунунии Қазоқистон гуфтугӯ кард

Газета.ру. Тибқи иттилои котиби матбуоти СААД, Дабири кулли Созмон Станислав Зас бо  Президенти Беларус Александр Лукашенко ва ҳамтои қазоқаш Қосим-Жомарт Токаев гуфтугӯи телефонӣ анҷом дод. 

"Роҳбари давлати Қазоқистон ба созмон барои кумак дар рафъи буҳрон ва фиристодани Неруҳои дастаҷамъии посдори сулҳи СААД изҳори сипос кард",- гуфт ӯ.

Ба гуфтаи котиби матбуоти СААД, сарварони давлатҳо вазъи Қазоқистон ва иҷрои қарори Шурои СААД дар бораи   сафарбар намудани неруҳои посдори сулҳ барои ба эътидол овардани вазъиятро баррасӣ карданд.