Давоми 30 соли соҳибистиқлолии Ҷумҳурии Тоҷикистон соҳаҳои гуногуни хоҷагии халқи мамлакат рушду пешрафт намуданд. Аз ҷумла, дар соҳаи нақлиёт дигаргуниҳои бузург ба вуқуъ пайваста, дар радифи сол аз сол афзудани шумораи нақлиёти шахсию ҷамъиятӣ роҳҳои ҷавобгӯйи меъёрҳои байналмилалӣ бунёд гардида истодаанд. 

Дар шаҳри Кӯлоб бо назардошти зиёд шудани ҳаракати нақлиёт, барои таъмини ҳаракати мунтазам ва пешгирӣ аз тамбашавии нақлиёт чораандешӣ карда мешавад. Бо истифода аз захираю имкониятҳои мавҷуда Мақомоти иҷроияи ҳокимияти давлатии шаҳри Кӯлоб бо ҷалби мутахассисон нақшаи корӣ тартиб дода, барои таъмиру азнавсозии роҳҳои шаҳр иқдом гирифт. Бо мақсади ба танзим даровардани ҳаракати нақлиёт дар хиёбони Исмоили Сомонӣ, хусусан, назди бозори «Саховат» ва марказҳои савдо, ки тамбашавии нақлиёт ба таври доимӣ ба назар мерасад, таъмиру азнавсозии роҳ аз кӯчаи Худоёр Назаров то назди пули сойи «Тебалай» дар кӯчаи Чармгарони Поён оғоз гардид. Паҳноии роҳ 7 метрро дар бар гирифта дар ду шафати он бунёди роҳи пиёдагард, шабакаҳои равшаннамоӣ, хатҳои обгузар ва дигар воситаҳои хизматрасонӣ пешбинӣ гардидаанд. Ин қитъаи роҳ мутобиқ ба меъёрҳои муосири роҳсозӣ ва бо риояи қоидаҳои мавҷуда бунёд мешавад. Ҳамзамон, роҳбарияти шаҳри Кӯлоб масъулони Идораи обу корез, Шабакаҳои барқ ва соҳаи боғбунёду равшанинамоиро муваззаф намуд, ки ҷиҳати дар муҳлати муайншуда ва бо сифати баланд иҷро шудани корҳои сохтмонӣ таваҷҷуҳи ҷиддӣ зоҳир намоянд. Сокинони маҳаллаи Чармгарони Поён бо изҳори миннатдорӣ аз ташаббуси созандагии шаҳрдорӣ ваъда доданд, ки баъди навсозию мавриди истифода қарор гирифтани роҳи мошингарди кӯча ба тозаву озода нигоҳ доштани он муваззаф хоҳанд шуд. Тибқи иттилоъ, дар оянда барои боз ҳам беҳтар гардидани ҳаракати бемамонияти нақлиёт аз болои сойи Тебалай як пули мошингард бунёд, роҳи паҳлуи сой аз хиёбони Исмоили Сомонӣ то кӯчаи Даминзода таъмир ва самтҳои ҳаракати нақлиёт муайян мешаванд. 

 

Далер ШАРИФОВ, 

мудири бахши матбуотии МИҲД шаҳри Кӯлоб