мулоқотҳо
Аз ҳамкории сеҷонибаю чорҷониба изҳори қаноатмандӣ шуд
29 апрел, нимаи дуюми рӯз, Президенти Ҷумҳурии Тоҷикистон Эмомалӣ Раҳмон вазири корҳои дохилии Ҷумҳурии Исломии Покистон Абдураҳмон Маликро ба ҳузур пазируфт.
Дар мулоқот масоили ҳамкории дуҷониба ва бисёрҷонибаи Тоҷикистону Покистон баррасӣ шуданд.
Мубодилаи иттилооту таҷрибаи ҳамгироӣ дар мубориза бо ҷинояткории созмонёфтаи байналмилалӣ, аз ҷумла терроризму экстремизм ва гардиши ғайриқонунии маводи мухаддир аз самтҳои асосии ҳамкории ду кишвар арзёбӣ гардид.
Аз равобити пайваста ва ҳамкории сеҷонибаи миёни Тоҷикистон, Покистон ва Афғонистон ва чорҷониба бо ҳамроҳшавии Федератсияи Русия, ки рӯ ба густариш доранд, изҳори қаноатмандӣ шуд.
Гуфтугӯи судманд ҳамчунин оид ба роҳҳои таҳким ва густариши ҳамкории иқтисодию тиҷоратӣ ва нақлиётию транзитии Тоҷикистону Покистон сурат гирифт. Ба гуфти Абдураҳмон Малик, Тоҷикистон метавонад аз иқтидори транзитии бандари Гвадари Покистон бемонеа истифода барад.
Татбиқи лоиҳаи КАСА – 1000 оид ба бунёди хати 500-киловолтаи интиқоли нерӯи барқ аз Тоҷикистон ба Покистон дорои аҳамияти ҳаётан муҳим барои ҳар ду давлат ва дигар кишварҳои минтақа маънидод гардид.
Дар мулоқот ҳамчунин оид ба дигар масоили мавриди таваҷҷӯҳ гуфтугӯ сурат гирифт.
www.president.tj
* * *
Абдураҳмон Малик, вазири корҳои дохилии Ҷумҳурии Исломии Покистон, баъд аз сӯҳбат бо Эмомалӣ Раҳмон, Президенти Ҷумҳурии Тоҷикистон, андешаҳояшро ба хабарнигорон чунин баён дошт:
- Мо бо ҷаноби Президент перомуни масоили вобаста ба рушди муносибатҳои ҳасанаи Тоҷикистону Покистон дар бахшҳои сиёсӣ, иқтисод, тиҷорат ва илму фарҳанг гуфтугӯи судманд анҷом додем. Сиёсати сулҳҷӯёна ва иқдомҳои шоистаи Президенти Тоҷикистон дар мавриди мубориза алайҳи хатарҳои ҷаҳонӣ, назири терроризму экстремизм ва қочоқи маводи мухаддир боиси эҳтиром қарор дорад. Ин ҳақиқатро ман бори дигар дар сӯҳбат бо эшон дарёфтам ва таваҷҷӯҳи хосаи Эмомалӣ Раҳмон ба вазъи Покистону Афғонистон, роҳҳои мубориза бо гурӯҳу шабакаҳои террористӣ мавриди ситоиш аст.
Вазири корҳои дохилии Покистон аз ҷараёни вохӯрӣ бо вазирони корҳои дохилӣ, мудофиа ва раиси Кумитаи давлатии амнияти миллии Ҷумҳурии Тоҷикистон қаноатмандӣ карда, афзуд, ки мо нақшаи муборизаи муштараки ниҳодҳои қудратии ду кишвари ба ҳам дӯсту бародарро алайҳи таҳдидҳои нави ҷаҳонӣ таҳия намудем. Ман итминон дорам, ки мо дар ин самт ба натиҷаҳои назаррас ноил мегардем.
Абдураҳмон Малик пуштибонии кишварашро аз сиёсати энергетикии Тоҷикистон баён дошта, гуфт, ки бунёди нерӯгоҳҳои барқи обӣ дар мисоли Роғун барои ҳамаи кишварҳои минтақа аз манфиат холӣ нест. Аз ҷумла татбиқи босамари пружаи КАСА-1000, ки интиқоли барқро ба давалати мо низ таъмин мекунад, Покистонро аз чунин манфиат дар канор нахоҳад гузошт.
Додоҷон Рӯзиев,
«Ҷумҳурият»
Баёни ақида (0) Санаи нашр: №: Мутолиа карданд: 1712
