Дар даврони соҳибистиқлолии кишвар қадру манзалати забони модарии мо боло рафта, ба забони тавонои расмиву давлатии Ҷумҳурии Тоҷикистон табдил ёфт. Ин даврон барои ташаккули забони тоҷикӣ имконоти мусоид фароҳам овард, ки дар натиҷа забони тоҷикӣ зиёд рушд намуд. Маҳз дар ҳамин давраи таърихи давлатдории навини тоҷикон забони тоҷикӣ ҳамчун неру ва омили муҳими иттиҳоди миллату халқҳои сокини мамлакатамон пазируфтаву шинохта шуд.

Ин муддат барои мустаҳкам намудани пояҳои забони давлатӣ заминаи мусоид фароҳам оварда шуд. 30 – юми июни соли 2012  «Барномаи рушди забони давлатии Ҷумҳурии Тоҷикистон барои солҳои 2011 – 2016» аз ҷониби  Ҳукумати Ҷумҳурии Тоҷикистон  қабул гардид, ки дар он шаш самти афзалятноки пешбурди забони давлатӣ тарҳрезӣ шуда, ҷиҳати татбиқи он корҳои назаррас анҷом пазируфт. Баъдан, аз ҷониби Ҳукумати Ҷумҳурии Тоҷикистон «Барномаи рушди забони давлатӣ барои солҳои 2020 – 2030» қабул гардид, ки он барои пешбурди кори забон дар даҳ соли оянда заминаи боэътимод мегузорад. Барномаи мазкур ҷомеаи Тоҷикистон ва тамоми сохторҳои давлатию ғайридавлатиро водор менамояд, ки ба масъалаи забон аҳамияти аввалиндараҷа зоҳир намоянд.

Қобили зикр аст, ки нақши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушду нумӯи забони тоҷикӣ хеле бузург аст. Сарвари давлат борҳо таъкид намудаанд: «То даме, ки миллати тоҷик ҳаст, забони ӯ пойдор аст». Инкишофи забон нишондиҳандаи пешрафти миллат ва давлат мебошад. Забони тоҷикӣ ин ёдгории маънавии миллӣ, ҳамчун оинаи таърихи деринаи халқи тоҷик, инъикосгари урфу одат ва расму анъанаҳои милливу давлатдории тоҷикон аст. Забони давлатӣ, бешубҳа таҷассумгари таърихи пуршебу фарози халқи куҳанбунёди тоҷик мебошад, ки дар тули асрҳо ҳамроҳ бо наслҳои худ аз мушкилоту монеаҳои гуногун гузаштааст.

Забони тоҷикӣ забонест, ки бо он олимон, шоирону адибони барҷастаи миллат осори бебаҳои худро таълиф намудаанд. Ва боиси фараҳмандист, ки забони шевое, ки бо он аз асосгузори адабиёти тоҷику форс одамушшуаро Абуабдуллоҳи Рӯдакӣ сар карда, то бунёдгузори адабиёти муосири тоҷик, Қаҳрамони Тоҷикистон устод Садриддин Айнӣ эҷод кардаанд, муаррификунандаи воқеии миллати тоҷик дар ҷаҳони имрӯза гардид.

Заминаҳои ин пешрафти муҳим, пеш аз ҳама бо тадбиқи сиёсати Ҳукумати Ҷумҳурии Тоҷикистон таҳти сарварии Пешвои миллат муҳтарам Эмомалӣ Раҳмон дар робита ба забони давлатӣ матраҳ гардид.

Дар барномаи рушди забони давлатии Ҷумҳурии Тоҷикистон таъкид шуда, ки сиёсати давлатӣ оид ба забони Ҷумҳурии Тоҷикистон дар асоси меъёрҳои байналмилалии баробарии забонҳо муайян гардидааст. Забони тоҷикӣ дар ташаккули худшиносӣ, худогоҳии шаҳрвандон, боло бурдани ҳисси ватандӯстӣ ва рушди ҷаҳонбинии сиёсиву фарҳангии аҳли ҷомеа нақши созгор дорад. Забони модарии мо мероси таърихии мост ва арҷ гузоштан, эҳтиром намудани мероси фарҳангиву маънавии миллатро Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вазифаи муқаддаси ҳар фарди баору номуси кишвар мешуморанд.

 

Сафарбек  АБДУЛЛОЕВ,

Алишер ҲАКИМОВ,  

устодони Коллеҷи тиббии ноҳияи Ёвон