Дар Ӯзбекистон ба муносибати 581-умин солгарди зодрӯзи мутафаккири бузург Мир Алишери Навоӣ достони «Лайлӣ ва Маҷнун»-аш дар тарҷумаи Ҷонибеки Қувноқ ба забони тоҷикӣ чоп шуд. Китоби мазкур бо ташаббуси Маркази фарҳангии миллии тоҷикони вилояти Ҷиззах ва дар асоси гранти Бунёди ҷамоатии шурои намояндагони халқи вилояти Ҷиззах  нашр гардидааст.

Муаррифии китоби мазкур дар шаҳри Тошканд дар ҳамкорӣ бо Кумитаи равобити байналмилалӣ ва дӯстӣ бо кишварҳои хориҷӣ дар назди Девони вазирони Ҷумҳурии Ӯзбекистон, Маркази ҷумҳуриявии фарҳанги миллии тоҷикон ва Иттифоқи нависандагони Ӯзбекистон баргузор гашт. Дар он  оид ба нақши бузурги Навоӣ дар инкишофи забон ва адабиёти ӯзбек, дӯстию ҳамкории Мавлоно Абдураҳмони Ҷомӣ ва Алишери Навоӣ, тарҷума ва чопи  достони «Лайлӣ ва Маҷнун» ба забони тоҷикӣ фикру мулоҳизаҳои хубе баён гардиданд.

– Шоир Ҷонибек Қувноқ солҳои зиёд достони «Лайлӣ ва Маҷнун»-и Навоиро ба забони тоҷикӣ тарҷума кард, – гуфт раиси бахши вилоятии Маркази фарҳангии миллии тоҷикони вилояти Ҷиззах Абдукарим Шарифов. – Мутаассифона, умри ин эҷодкор кӯтоҳ будаст,  нашр  ва муаррифии китоби мазкур ба вай тақдир накард. Бешубҳа, тарҷумаи осори адибони ӯзбек ба тоҷикӣ барои боз ҳам густариш ва таҳкими робитаҳои адабии ду халқи бародар хизмат мекунад.

Дар маросими муаррифӣ сафири Ҷумҳурии Тоҷикистон дар Ҷумҳурии Ӯзбекистон Абдуҷаббор Раҳмонзода ва раиси Маркази миллии фарҳангии тоҷикони Ӯзбекистон Гуландом Субҳонова заҳмати фидокоронаи тарҷумони китоби «Лайлӣ ва Маҷнун»- ро эътирофу ба ташаббускорони ин кори хайр миннатдорӣ баён намуданд. 

Китоб таҳти назари Асадуллоҳ Шукуров, раиси шуъбаи тоҷикии Иттифоқи нависандагони Ӯзбекистон, дар нашриёти «Туроннашр»-и Самарқанд ба табъ расидааст. 

 

Фарҳод НЕЪМАТОВ, рӯзноманигор, шаҳри Ҷиззахи Ҷумҳурии Ӯзбекистон