ҳуқуқ
Ҷиноят ва ҷазо
ТАНЗИМ
Ҷавобгарӣ барои риоя накардани қонун
Мақомоти ҳифзи ҳуқуқ Шукруллои Муқим, сокини ноҳияи Абдураҳмони Ҷомӣ ва Алишер Қурбонов, сокини ноҳияи Мир Сайид Алии Ҳамадонии вилояти Хатлонро, барои риоя накардани муқаррароти Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ба ҷавобгарӣ кашиданд.
Тибқи иттилои маркази матбуоти Прокуратураи генералӣ, нисбат ба Шукруллои Муқим барои вайрон кардани талаботи моддаҳои 10, 14 ва Алишер Қурбонов барои нақзи муқаррароти моддаҳои 4, 5 ва қисми 2 моддаи 11 Қонуни мазкур парвандаҳои ҳуқуқвайронкунии маъмурӣ оғоз шуда, нисбат ба онҳо бо моддаи 481 қисми 1 Кодекси ҳуқуқвайронкунии маъмурӣ ҷазо дар намуди ҷарима ба андозаи 100 нишондиҳанда барои ҳисобҳо, баробар ба 6000 сомонӣ таъин карда шуд.
ҒОРАТГАРӢ
Оғози парвандаи ҷиноятӣ алайҳи ду ғоратгари маст
Кормандони мақомоти корҳои дохилӣ дар шаҳри Хуҷанд алайҳи ду сокини шаҳр, ба гумони содир кардани ҷинояти ғоратгарӣ, парвандаи ҷиноятӣ оғоз намуданд.
Маркази матбуоти Вазорати корҳои дохилӣ аз гумонбарон мардони 33 ва 21 - сола ном бурда, иттилоъ медиҳад, ки ҳодисаи ғоратгарӣ 2 феврал дар маҳаллаи 34-уми шаҳри Хуҷанд ба амал омадааст. Он рӯз гумонбарон дар ҳолати мастӣ як сокини шаҳр (марди 25-сола)-ро лату кӯб намуда, 4 ҳазор сомониашро тасарруф карда, аз ҷойи ҳодиса ғайб заданд.
Феълан, тафтиши ин ҳодиса бар асоси моддаи 248 Кодекси ҷиноятӣ идома дорад.
ДУЗДӢ
Боздошти марде, ки пеш бо 4 модда суд шудааст
Аз ҷониби кормандони шуъбаи Вазорати корҳои дохилӣ дар ноҳияи Спитамен нисбат ба як сокини ноҳия (марди 37-сола), ки қаблан бо моддаҳои 274 қисми 5, 388 қисми 1 ва 32 қисми 2, 244 қисми 2 Кодекси ҷиноятӣ суд шудааст, парвандаи ҷиноятӣ оғоз гардид.
Ба иттилои сомонаи ВКД, марди қаблан судшуда ин навбат дар содир намудани ҷинояти дуздӣ (моддаи 244 Кодекси ҷиноятӣ) гумонбар дониста мешавад. Ӯ 17 январи соли 2022 дар ҳолати мастӣ бо роҳи пинҳонӣ аз назди мағозаи «Файз»-и ноҳияи Спитамен дучархаи як сокини дигари ҳамин ноҳияро дуздидааст, ки зарари расондашуда 2 ҳазору 879 сомониро ташкил медиҳад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 10.02.2022 №: 28 Мутолиа карданд: 2446