ҳуқуқ
ҶИНОЯТ ВА ҶАЗО
КОРРУПСИЯ
БОЗ ЯК "ЗАМИНФУРӮШ"-РО БА ТОЛОРИ СУД БУРД
Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки парвандаи ҷиноятӣ нисбат ба Темур Мустафоқулов, муовини раиси кумитаи замини ноҳияи Деваштич, бо тасдиқи фикри айбдоркунӣ ба суд ирсол шудааст.
Тибқи иттилои маркази матбуотии ин ниҳод, чанде қабл кормандони агентӣ Темур Мустафоқуловро ҳангоми аз шаҳрванд «А» гирифтани 7000 сомонӣ барои ба номи бародараш ҷудо карда додани қитъаи замини наздиҳавлигӣ дастгир намуданд. Ин дар ҳолест, ки айбдоршаванда то замони дастгир шуданаш барои ҷудо кардани қитъаи замин аз шаҳрванд «А» пешакӣ, дар маҷмуъ, 16000 сомонии дигар гирифтааст.
Парвандаи ҷиноятӣ нисбат ба ӯ бо моддаи 247 қисми 3 Кодекси ҷиноятӣ оғоз гардидааст, ки ин банди қонун ҷазо дар намуди ҷарима ба андозаи аз нуҳсаду дувоздаҳ то як ҳазору чорсаду шаст нишондиҳанда барои ҳисобҳо ё маҳрум сохтан аз озодӣ ба муҳлати аз панҷ то ҳашт сол бо мусодираи молу мулкро пешбинӣ менамояд.
ТАРТИБОТИ ҶАМЪИЯТӢ
МАСТОНИ МАРДУМОЗОР 10- ШАБОНАРӮЗӢ ҲАБС ШУДАНД
Кормандони мақомоти милитсия дар шаҳри Душанбе ду сокини пойтахтро барои вайрон кардани тартиботи ҷамъиятӣ боздошт намуданд, ки нисбат ба онҳо чораҳои дахлдори қонунӣ андешида шуданд.
Бино ба иттилои РВКД дар шаҳри Душанбе, Ҳошимшо Боев, истиқоматкунандаи кӯчаи Қаротегин ва Хуршед Бердиев, истиқоматкунандаи кӯчаи Ҷалол Икромии пойтахт, ҳангоми мастӣ дар ҳудуди шаҳр тартиботи ҷамъиятиро вайрон карда, боиси озори шаҳрвандон гардидаанд.
Вобаста ба ин ҳолат, бо моддаи 460 Кодекси ҳуқуқвайронкунии маъмурӣ (майдаавбошӣ) протоколҳои маъмурӣ тартиб дода шуда, аз ҷониби суд нисбат ба онҳо ҷазо дар намуди ҳабси маъмурӣ ба муҳлати 10 шабонарӯз таъин карда шуд.
МИЛИТСИЯ
ДОНИШҶӮЙИ КОРДБАДАСТРО БА ҶАВОБГАРӢ КАШИД
Ҳабибулло Одинаев, донишҷӯйи Донишгоҳи аграрии Тоҷикистон ба номи Шириншоҳ Шоҳтемур, зимни баргузории амалиёти «Корд» ба дасти кормандони милитсия афтод.
Тавре РВКД дар шаҳри Душанбе хабар дод, зимни амалиёт аз ин донишҷӯй як адад корд дарёфту мусодира гардида, нисбаташ протоколи ҳуқуқвайронкунии маъмурӣ тартиб дода шудааст. Дар натиҷа, донишҷӯйи кордбадаст бо қарори суд 5 шабонарӯз ба ҳабси маъмурӣ гирифта шуд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 16.02.2022 №: 32 Мутолиа карданд: 3555