Маркази омӯзиши пиряхҳои Академияи миллии илмҳои Тоҷикистон  дар ҳамкорӣ бо Осорхонаи миллӣ дар мавзуи «Пиряхҳои Ҷумҳурии Тоҷикистон: вазъ, ҳолат ва дурнамо» ҳамоиши илмӣ баргузор намуд. 

- Пиряхҳо яке аз манбаъҳои асосии захираҳои об ба ҳисоб рафта, нақши онҳо дар таъмини кишварҳои дунё бо об ва сероб гардидани дарёҳо муҳим аст. Ҷомеаи ҷаҳонӣ, махсусан Ҳукумати Ҷумҳурии Тоҷикистон, баҳри ҳифзи пиряхҳо ҳамчун сарчашмаи об кӯшиши ҳамаҷониба ба харҷ дода, тадбирҳои назаррас андешида истодаанд, - гуфт Абдулҳамид Қаюмов, директори  Маркази омӯзиши пиряхҳои АМИТ. 

Зикр гардид, ки Ҷумҳурии Тоҷикистон давлати кӯҳсор буда, макони яхбандиҳои Осиёи Марказӣ мебошад. Пиряхҳои хурду бузург 6 дарсади  ҳудуди кишварро ташкил намуда, манбаи асосии дарёи калонтарини Осиёи Марказӣ – Амударё ва ҳавзаи баҳри Арал ба ҳисоб мераванд. Аз ин рӯ, вазъи пиряхҳои мамлакат ҳамеша таҳти таваҷҷуҳи Президенти ҷумҳурӣ муҳтарам Эмомалӣ Раҳмон ва Ҳукумати кишвар қарор доранд. Маҳз натиҷаи ташаббусҳои роҳбарияти олии мамлакат доир ба  масъалаи обшавии пиряхҳо буд, ки имрӯз дар назди Академияи миллии илмҳои Тоҷикистон Муассисаи давлатии илмии «Маркази омӯзиши пиряхҳо» таъсис ёфтааст. Марказ дар кори омӯзиш ва муайянсозии вазъи пиряхҳо дар Ҷумҳурии Тоҷикистон нақши калидӣ дорад.

Ёдовар мешавем, ки Барномаи давлатии омӯзиш ва ҳифзи пиряхҳо дар Тоҷикистон барои солҳои 2010 – 2030 барои мониторинг ва омӯзиши доимии пиряхҳо таҳия шудааст. Тоҷикистон, ки дар саргаҳи манбаъҳои муҳими обии минтақа қарор дорад, кишвари танзимкунандаи маҷрои дарёҳо ва иқлим низ мебошад. 

 

Лола РИЗОӢ