Сарвазири мамлакат Қоҳир Расулзода бо мақсади шиносоӣ бо вазъи корҳои ободониву бунёдкорӣ, омодагӣ ба кишти баҳорӣ, вусъати корҳои соҳилбандӣ ба вилояти Хатлон сафари корӣ анҷом дод. 

Аз ҷумла, Қоҳир Расулзода ва раиси вилоят Қурбон Ҳакимзода дар ноҳияи Ҷалолиддини Балхӣ аз рафти сохтмони маҷмааи варзиш ва дигар иншооти бунёдшаванда дидан намуда, барои тезондани бунёди иншоот ва босифат ба анҷом расондан маслиҳатҳои муфид дод.

Қоҳир Расулзода, инчунин, аз рафти сохтмони бинои Кумитаи иҷроияи Ҳизби Халқии Демократии Тоҷикистон дар ноҳия боздид намуд. Иттилоъ дода шуд, ки корҳои сохтмонӣ дар иншоот соли 2020 оғоз гардида, он дар деҳаи Сари роҳи Ҷамоати шаҳраки Балх ҷойгир аст. Бино ба тариқи ҳашар аз тарафи аъзои ҳизб, бо кумаки Мақомоти иҷроияи маҳаллии ҳокимияти давлатии ноҳия, ташкилоту муассисаҳо, соҳибкорон, хоҷагиҳои кишоварзӣ сохта шуда истодааст. Тибқи нақша бино моҳи марти соли равон ба истифода дода мешавад. 

Инчунин, Сарвазири мамлакат дар маркази ноҳия аз рафти сохтмони бинои маъмурии прокуратура дидан кард. Сохтмони иншооти мазкур соли 2018 оғоз ёфта, аз се ошёна ва таҳхона иборат аст. Дар бинои асосӣ ҳуҷраҳои корӣ, маҷлисгоҳ, дар ошёнаи сеюм меҳмонхона ва хобгоҳ барои кормандон сохта шудаанд. Айни замон корҳои пардозгарӣ, рангубор ва ободонии гирду атрофи бино боқӣ мондаанд.

Дар ҷараёни сафар, ҳамчунин, Қоҳир Расулзода бо раванди бунёдкориҳо дар бозори замонавӣ дар Ҷамоати деҳоти ба номи Садриддин Айнӣ шинос гашт. Иншоот аз ҳисоби маблағҳои соҳибкори ватанӣ бо ҷалби 120 коргари маҳаллӣ бунёд мегардад. Он дар масоҳати 4 гектар сохта шуда, бинои асосӣ аз ду ошёна ва 50 нуқтаи савдо иборат аст. Дар саҳни бозор 9 соябони савдо ва 3 таваққуфгоҳи нақлиёт ҷой дода шудааст. Харҷи сохтмони иншоот 21 миллион сомониро ташкил медиҳад. Бо мавриди истифода қарор гирифтани он 800 ҷойи кори нави доимӣ таъсис меёбад.

 

БА ИСТИФОДА ДОДАНИ  БИНОИ ТАВАЛЛУДХОНА

Дар ноҳияи Хуросон бо иштироки Сарвазири мамлакат Қоҳир Расулзода ва раиси вилоят Қурбон Ҳакимзода бинои шуъбаи таваллудхона дар назди беморхонаи минтақавии № 6 -и ноҳия мавриди баҳрабардорӣ қарор гирифт. Бинои мазкур бо маблағгузории Ташкилоти ҷамъиятӣ – хайриявии «Тоҷикистон» аз ҷониби ҶДММ «Масъудиён» сохта шуда, аз 1 ошёна ва 10 ҳуҷра иборат аст. 

То ин муддат дар назди беморхонаи минтақавӣ шуъбаи таваллудхона мавҷуд набуд ва аҳолии деҳот барои гузаштан аз ташхис ба маркази ноҳия масофаи зиёда аз 10 километрро тай менамуд. Бунёди ин бинои замонавӣ фаъолияти табибони ноҳияро боз ҳам тақвият бахшида, туҳфаи арзанда дар арафаи Ҷашни Наврӯзи байналмилалӣ ба шумор меравад. 

Сарвазири мамлакат аз табибон даъват ба амал овард, ки сатҳу сифати хизматрасонии тиббиро ба аҳолӣ хуб намоянд ва бо мақсади пешгирӣ аз бемориҳои сироятӣ, бахусус бемории коронавирус байни аҳолӣ бештар корбарӣ кунанд.

Дар ҷараёни сафари корӣ, Сарвазири мамлакат дар маъракаи бунёди токзор дар хоҷагии деҳқонӣ-фермерии «Бибиузбакбӣ» воқеъ дар Ҷамоати деҳоти Ғаллаободи ноҳияи Хуросон ширкат варзид. Токзори мазкур дар майдони 150 гектар бунёд гашта, дар он 10 намуд ангури хуштаъм шинонда мешавад. То имрӯз тибқи иттилои масъулон дар ин токзор беш аз 83 ҳазор бех токи ангур шинонда шудааст. Аксарияти токзорро навъи ангури шоҳона, карбинал, ҳусайнии сафед ва сиёҳ ташкил медиҳад. 

 

БОЗДИД АЗ ХОҶАГИҲОИ ДЕҲҚОНӢ  ВА ИФТИТОҲИ БИНОИ МУАССИСАИ  ТАЪЛИМӢ

Дар идомаи сафари корӣ Қоҳир Расулзода бинои Муассисаи таҳсилоти миёнаи умумии № 51-и ноҳияи Хуросонро ифтитоҳ бахшид. Бинои таълимӣ аз 8 синфхонаи иловагӣ иборат буда, бо маблағгузории Ташкилоти ҷамъиятӣ - хайриявии «Тавҳид» аз ҷониби ҶДММ «Лоиҳаҳои меросӣ» бунёд гардидааст. Муассисаи таълимӣ дар деҳаи Ҳақиқати деҳоти Ғаллаободи ноҳияи Хуросон ҷойгир буда, дар он 390 хонанда ба таҳсил фаро гирифта шудааст.

Бинои муассиса аз 1 ошёна иборат буда, бо шароити муосир таъмин аст. Маблағи умумии лоиҳаи бино 800 ҳазор сомониро дар бар мегирад. Маъмурияти муассиса ҳадаф дорад сарсабзии атрофи онро таъмин намояд.

 

Нигина РАҲМОН,  «Ҷумҳурият»