Вазири корҳои хориҷии Ҷумҳурии Тоҷикистон Сироҷиддин Муҳриддин бо директори минтақавии Дафтари ҳамоҳангсозии рушди Созмони Милали Муттаҳид дар Аврупо ва Осиёи Марказӣ хонум Гви-Еоп Сон суҳбат орост.

Дар вохӯрӣ ҳамкориҳои дуҷонибаи Тоҷикистон ва СММ, аз ҷумла ислоҳоти СММ оид ба рушди устувор ва фаъолияти намояндагиҳои СММ дар ин самт ва соҳаҳои дигари авлавиятнок мавриди баррасӣ қарор гирифтанд.

 

 

 

Дидор бо ҳайати порлумони Аврупо

Сироҷиддин Муҳриддин, вазири корҳои хориҷии Тоҷикистон, бо ҳайати порлумони Аврупо таҳти роҳбарии раиси Кумитаи корҳои байналмилалии порлумони Аврупо Дэвид Макаллистер мулоқот намуд.

Дар вохӯрӣ муносибатҳои дуҷониба байни Тоҷикистон ва Иттиҳоди Аврупо, аз ҷумла ҳамкориҳои байнипорлумонӣ, инчунин, вазъ дар минтақа ва дигар масъалаҳо мавриди таваҷҷуҳи ҷонибҳо қарор гирифтанд.

 

 

Масъалаи инъикоси дунявият дар адабиёти классикии тоҷик

Дар Академияи миллии илмҳои Тоҷикистон дар мавзуи «Аҳамияти андешаҳои дунявӣ дар ташаккули худшиносии миллӣ» конфронси илмӣ доир гардид. Дар ҳамоиш, ки бо иштироки роҳбарияти академия, Вазорати маориф ва илм, олимон ва коршиносон сурат гирифт, масъалаҳои инъикоси дунявият дар адабиёти классикии тоҷик баррасӣ шуданд.

Президенти Академияи миллии илмҳо Фарҳод Раҳимӣ, узви вобастаи Академияи миллии илмҳо Саймумин Ятимов, директори Маркази мероси хаттии АМИТ, номзади илмҳои таърих Раҳматкарим Давлатов, устоди Донишгоҳи миллӣ, адабиётшинос Ҳафиз Раҳмон перомуни афкори дунявӣ ва тафаккури миллӣ, дунявият ҳамчун асоси пойдории давлат ва сохти конститутсионӣ, нақши таълим ва ҷаҳонбинии илмӣ дар рушду устувории пояҳои давлатдории миллӣ мубодилаи афкор намуданд.

 

 

Валентина Матвиенко ба Душанбе меояд

Сафири фавқулода ва мухтори Ҷумҳурии Тоҷикистон дар Россия Давлатшоҳ Гулмаҳмадзода бо муовинони раиси Шурои Федератсияи Маҷлиси Федералии Федератсияи Россия Константин Косачев ва Николай Журавлёв зимни як вохӯрӣ муносибатҳои Тоҷикистону Россияро дар соҳаҳои иқтисоду савдо, тандурустӣ, маориф ва илм, фарҳанг, муҳоҷирати меҳнатӣ ва ҳамкории байниминтақавӣ муҳокима карданд.

Онҳо, инчунин, масоили омодагӣ ва баргузории сафари расмии раиси Шурои Федератсияи Маҷлиси Федералии Федератсияи Россия Валентина Матвиенкоро ба Душанбе, ки 24-25 феврал дар назар аст, баррасӣ намуданд.

 

 

Ифтитоҳи Маркази омӯзишӣ барои занони роҳбар

Дар асоси розигии Президенти кишвар муҳтарам Эмомалӣ Раҳмон аз ҳисоби маблағҳои намояндагии СММ - Занон дар Тоҷикистон бо мақсади тавсеаи ҳамкориҳои байналмилалӣ дар Академияи идоракунии давлатӣ бо мақсади таҳия ва татбиқи лоиҳаҳо марбут ба масъалаҳои занон, баланд бардоштани иқтидори зеҳнии онҳо, рушди захираи кадрҳои роҳбарикунанда аз ҳисоби занон, дарёфт ва омодасозии кадрҳои баландихтисос ва баланд бардоштани мавқеи устувори занон дар ҷомеа “Маркази омӯзишӣ ва дастгирии занони роҳбарикунанда ва болаёқат” ифтитоҳ гардид.

Дар ифтитоҳи он ректори академия Абдухалил Ғафурзода, мушовири бахши ёрдамчии Президенти Ҷумҳурии Тоҷикистон оид ба масъалаҳои кадрҳо Олимшо Меҳрӣ, вазири меҳнат, муҳоҷират ва шуғли аҳолӣ Ширин Амонзода, раиси Кумитаи кор бо занон ва оила Ҳилолбӣ Қурбонзода, директори Агентии хизмати давлатӣ Ҷумъа Давлатов ва шарикони хориҷии  академия, аз ҷумла намояндагии СММ - Занон дар Тоҷикистон, намояндагии Бунёди кӯдакони СММ дар Тоҷикистон (ЮНИСЕФ) ширкат карданд.