Маҳз бо ташаббус ва талошҳои пайвастаи Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ 29 сол қабл, Қувваҳои Мусаллаҳ аз сирф таъсис ёфта, ба як неруи пуриқтидор табдил ёфт, ки айни замон қодир аст амнияти давлату миллатро таъмин намуда, марзу буми кишварамонро пурра ҳифз намояд. Дар тули фаъолияти худ, қудрату тавоноӣ ва омодагии комили Қувваҳои Мусаллаҳ дар ҳимоя, пешгирӣ ва мубориза бар зидди ҳама гуна хавфу хатар ва таҳдидҳо борҳо  собит гаштааст, ки мояи ифтихор ва сарфарозии ҳар шаҳрванди соҳибғурури Меҳан аст.

Кумитаи кор бо ҷавонон ва варзиши назди Ҳукумати Ҷумҳурии Тоҷикистон кӯшиш карда истодааст, ки насли ҷавони имрӯза дар руҳияи баланди ватандӯстӣ ба камол расад ва омодаи ҳимояи Ватан аз ҳама гуна хатари эҳтимолӣ бошад. Имрӯз ҷавонони бонангу номусамон ба хубӣ дарк менамоянд, ки дӯст доштани Ватан ва ҳифзи марзи он рисолат ва масъулияти онҳост. Ҳимояи марзу буми Тоҷикистони азиз баробар ба ҳифзи шаъну шараф, нангу номус ва қадру манзалати миллиамон мебошад. Ҳифзи Ватан баробар ба ҳифзи домони поки модарону хоҳаронамон масъалаи номусӣ ва қарзи фарзандӣ аст. 

Аз ин рӯ, ҷавонон бояд аз доштани давлати соҳибихтиёри худ ифтихор кардан, онро самимона дӯст доштан, волоияти қонунро таъмин сохтан, ваҳдати миллӣ ва худшиносиву худогоҳиро дар замири худ таҳким бахшиданро шарти ҷавонмардӣ ва масъулияти шаҳрвандӣ ҳисобанд.

Барои насли ояндасози кишвар хизмат дар сафи Қувваҳои Мусаллаҳ муҳимтарин мактаби обутоби ҳаёт ва ҷавонмардиву ҷасорат аст. Маҳз дар ҳамин мактаб ҷавонписарон сабақи шуҷоату садоқатмандӣ гирифта, муҳофизати хоки поки Ватанро меомӯзанд. Вақте ки мо ватандӯстӣ мегӯем, пеш аз ҳама муҳофизати Ватан ва якпорчагии марзу буми кишварро дар назар дорем. Вазифаи ҳар як шаҳрванди ватандӯст афзун намудани дастовардҳои Истиқлоли давлатӣ ва таҳкими рукнҳои давлатдорист, ки яке аз ин рукнҳо Қувваҳои Мусаллаҳ мебошад.

Беҳтарин ва равшантарин изҳори ватандӯстӣ, хизмат кардан ба Ватан аст, ки онро сарбозону афсарони шуҷои Қувваҳои Мусаллаҳ анҷом дода истодаанд.

Дар яке аз суханрониҳои хеш Пешвои миллат таъкид намуданд: “Ба ғайрату матонат, далерию шуҷоат ва ҳисси баланди миллии афсарону сарбозони бонангу номуси Ватан бовар дорем ва аз онҳо ифтихор мекунем”.

Дар ҳошияи ҳамин гуфтаҳои Пешвои муаззами миллат барои тақвияти сафҳои Қувваҳои Мусаллаҳ, боз ҳам баланд бардоштани руҳияи ҷангии сарбозони бонангу номус ва шуҷои Ватан, дар байни онҳо таҳким бахшидани арзишҳои неки инсонӣ, амсоли барои ҳамдигар дӯсту рафиқ будан, ғамгусору мутакко шудан кӯшиш намоем. Бо нишон додани иттиҳоду ҳамбастагии бештар, сипоҳе аз мардони ҷангӣ доштани Қувваҳои Мусаллаҳи кишварро барои ҷаҳониён нишон диҳем. Собит намоем, ки мо насле дорем, аз авлоди Спитамену Муқаннаъ, Деваштичу Восеъ ва Темурмалику ҳазорон гузаштагони бонангу номуси худ, ки ҷони худро аз даст доданд, аммо шаъну шарафи истиқлолхоҳиву ватандориро барои мо - насли имрӯз ба мерос гузоштанд. 

 

Абдулло РАҲМОНЗОДА, 

раиси Кумитаи кор бо ҷавонон 

ва варзиши назди Ҳукумати Ҷумҳурии Тоҷикистон