Натиҷаи ҷинояте, ки бо ҳукмҳои тулонӣ анҷом шуд

Бо ҳукми коллегияи судӣ оид ба парвандаҳои ҷиноятии суди вилояти Хатлон Резвониан Сейедхоссен, шаҳрванди Ҷумҳурии Исломии Эрон, ки муваққатан дар шаҳри Душанбе истиқомат мекард, барои содир намудани ҷинояти роҳзанӣ ва сӯиқасд ба одамкӯшӣ бо бераҳмии махсус 17 сол равонаи зиндон шуд.

Дар ин бора маркази матбуоти Прокуратураи генералии Ҷумҳурии Тоҷикистон хабар дода, сокини шаҳри Кӯлоб Комрон Нуралиевро дар ҳамдастӣ ба ин ҷиноят гунаҳкор меҳисобад, ки ӯ низ бо ҳукми суд 15 сол аз озодӣ маҳрум гардид. Тибқи иттилои манбаъ, шаҳрванди ҶИЭ аз рӯи хусумат ва ҳиссиёти рашк тибқи маслиҳати пешакӣ бо Комрон Нуралиев қасд ба ҷони собиқ ҳамсараш Г. Ашурзода намуда, ҳангоми дар ноҳияи Ёвон қарор доштанаш ӯро мавриди ҳадаф қарор доданд. Резвониан бо Комрон дар ноҳияи Ёвон Г. Ашурзодаро пайгирӣ намуда, 16 ноябри соли 2021 ҳангоми ба бинои истиқоматӣ ворид шуданаш ба рӯи ӯ ва дугонааш М. Абдуллоева кислотаи нитрат мепошанд. Илова бар ин, ҷабрдидаро табаркӯб намуда, баъд аз ба замин афтидан ба гумони ин, ки Г. Ашурзода ба ҳалокат расидааст, дороиҳояш бо ҷамъи 713 сомониро тасарруф намуда, аз ҷойи ҳодиса фирор мекунанд.

Хушбахтона Г. Ашурзода бо ёрии табибон аз марг наҷот ёфта, тибқи ҳукми суд маҳкумшудаҳо муҳлати адои ҷазоро дар муассисаи ислоҳии дорои низомаш сахт сипарӣ хоҳанд кард.

 

 

ҚАЛЛОБӢ

Ноболиғро фиреб доду 40 ҳазор доллари ҳамсояро гирифт

Як сокини ноҳияи Бобоҷон Ғафуров, ки маркази матбуоти Вазорати корҳои дохилӣ, аз ӯ марди 27-сола ном мебарад, дар содир намудани ҷинояти қаллобӣ гумонбар мешавад.

Бар пояи иттилои сомонаи ВКД, ин мард бо роҳи фиреб ба боварии ноболиғи 15-сола даромада, аз ӯ 40 ҳазор доллари ҳамсояаш (падари ноболиғ)-ро гирифта, ба эҳтиёҷоти худ сарф намудааст. Дар робита ба ин амал, ҳоло нисбат ба гумонбар аз тарафи кормандони ШВКД дар ноҳияи Бобоҷон Ғафуров бо моддаи 247 қисми 3 Кодекси ҷиноятӣ (қаллобӣ ба миқдори калон) оғоз шуда, тафтишот давом дорад.

 

ДУЗДӢ

Милитсия ба дасти марди ғоратгар 

завлона зад

Кормандони милитсияи шаҳри Хуҷанд марди 33-солаеро боздошт намуданд, ки дар дуздии 35 ҳазору 580 сомонӣ гумонбар мешавад.

Бино ба иттилои ВКД, боздоштшуда 12 феврали соли 2022 бо роҳи пинҳонӣ ба дафтари кории роҳбари ҶДММ «Фараҳ Ойл» (марди 31-сола) даромада, маблағро дуздидааст. Боздошти ӯ, дар пайи муроҷиати ҷабрдида муяссар шуда, айни ҳол вобаста ба ин ҳолат тафтишот оғоз гардидааст. 

 

Шуъбаи ҳуқуқи рӯзномаи «Ҷумҳурият»