Дар доираи маросими намоишгоҳи ихтисосии маҳсулоти Ҷумҳурии Исломии Эрон, ки дар шаҳри Душанбе доир гардид, намояндагони ин кишвар дар ҳайати намояндагии раиси вилояти Хуросони Разавӣ Яқубалӣ Назарӣ бо даъвати раиси вилояти Хатлон Қурбон Ҳакимзода ба вилоят ташриф оварданд. Меҳмононро Қурбон Ҳакимзода ва фаъолон дар шаҳри Норак истиқбол намуданд. Онҳо аз Неругоҳи барқи обии “Норак” боздид ба амал оварда, бо таъриху дастовардҳои он ошно гаштанд. 

Ба иттилои шуъбаи иттилоотӣ - таҳлилии дастгоҳи раиси вилоят, ҳамчунин, меҳмонон аз маҷмааи парандапарварии “Мармарӣ”, воқеъ дар ноҳияи Данғара дидан карданд. ҶДММ “Мармарӣ” дар истеҳсоли гӯшти мурғ саҳми бориз дорад. Ҷиҳати таъмини бозорҳои ватанӣ бо гӯшти мурғ меҳмонон ба кори роҳбарияти корхонаи мазкур баҳои баланд дода, даъват ба амал оварданд, ки баҳри ҳамкорӣ бо корхонаҳои парандапарварии кишварҳои ҳамсоя шартнома дошта бошанд. Ҳайати меҳмононро раиси вилоят Қурбон Ҳакимзода, инчунин, ба фаъолияти корхонаи истеҳсолии “Ҷунтай Данғара-Син Силу” ошно кард. Он яке аз корхонаҳои бузурги саноатии вилоят маҳсуб ёфта, кормандонро бо шароитҳои хуби корӣ таъмин кардааст. Меҳмонон ба сифати либосҳои истеҳсолнамудаи корхона баҳои баланд дода, аз шароити ҳаррӯзаи корӣ дар ин корхона пурсон шуданд. Гуфта шуд, ки тавассути ярмаркаҳои ҷойҳои холии корӣ аксарият кормандон ба кор ҷалб гардида, дар ин замина мутахассисони таҷрибадорро ҷалб кардаанд.

Дар идомаи сафар меҳмонон дар ноҳияи Данғара дар ҳайати соҳибкорон бо роҳбарии муовини раиси вилоят ва раиси ноҳия сари мизи гуфтушунид нишаста, оид ба ҳамкориҳои баъдӣ табодули назар карданд. Меҳмонон дар идомаи сафар дар вилояти Хатлон ба МОИ  “Данғара” ташриф оварда, аз корхонаҳои бузурги ин минтақа дидан намуданд. Роҳбарияти минтақа ҳангоми муаррифии корхонаҳо иброз намуд, ки дар МОИ  “Данғара” 5 ширкати эронӣ фаъолият намуда, ба истеҳсоли маводҳои шустушӯӣ, коркарди меваи хушк, писта, истеҳсоли битум, равғани муҳаррик ва полоиши нафтӣ, истеҳсоли нӯшоба, сачоқчаҳои коғазӣ, консерва ва болопӯшҳо машғул мебошанд. Дар баробари ин, дар ояндаи наздик боз бо ду ширкати дигар ҳамкорӣ ба роҳ хоҳанд монд. 

 

Нигина РАҲМОН, 

«Ҷумҳурият»