Дар Кохи “Суруш”-и шаҳри Душанбе маросими ҷоизасупории соҳаи варзиши мамлакат дар соли 2021 баргузор шуд. Аз ҷумла, варзишгароне, ки меъёрҳои Низомномаи Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзиширо иҷро карданд, қадр гаштанд.

32 варзишгари тоҷик, ки соли рафта миёни калонсолон, ҷавонон ва наврасон дар чемпионатҳои Осиё оид ба ҷудо, гӯштӣ, бокс, таэквондо медал ба даст овард, сазовори ҷоизаи Президенти Ҷумҳурии Тоҷикистон гардид. Бо ин мақсад аз Фонди Президенти Ҷумҳурии Тоҷикистон 450000 сомонӣ ҷудо шуд.

Ба барандагони медалҳои нуқра байни калонсолон 50000 сомонӣ (аз ин 10000 сомонӣ ба мураббӣ), биринҷӣ 25000 (5000), миёни наврасону ҷавонон ҷойи якум 18750 (3750), зинаи дуюм 12500 (2500) ва мақоми сеюм 6250 сомонӣ (1250 сомонӣ ба мураббӣ) тақдим гардид.  

Ҳамин тавр, Сомон Маҳмадбеков (ҷудо, 50000 сомонӣ), Далер Ризозода (гӯштии юнонӣ-римӣ, 50000), Комроншоҳ Устопириён, Темур Раҳимов (ҷудо, ба ҳар кадом 25000), Миҷгона Самадова, Шоира Зулқайнарова, Баҳодур Усмонов, Шаббос Негматуллоев (бокс, 25000), Моҳру Ҳалимова (таэквондо ВТ, 25000), Шодмон Ризоев (ҷудо, 18750), Муҳаммадҷон Абдуҷалилов, Парвиз Абдураҳмонов (ҷудо, 12500), Абубакр Шеров, Масъуд Аҳмадзода, Давлатҷон Назриев, Суруш Эркаев, Муҳаммад Юсуфзода (ҷудо, 6250), Руслан Ғафуров (бокс, 12500), Акбаралӣ Абдураҳмонзода, Искандарбек Рустамов, Абубакр Муродов, Абдураҳим Ёқубов, Сироҷиддин Ҳоҷиев, Анушервон Фозилов, Бузургмеҳр Иксанов, Шаҳбоз Додоҷонов, Муҳаммад Ҷабборов, Юсуф Фозилов, Нурланбек Эрматов, Акмалҷон Абдувалиев, Бибиҷон Музаффарова ва Дурандеш Зубайдов (бокс, 6250) сазовори ҷоиза гаштанд. 

Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои варзишии байналмилалӣ соли 2015 таъсис ёфта, тайи ҳафт сол 201 ҷоиза ба варзишгарон ва мураббиёнашон тақдим гардидааст, ки маблағи умумии он 4392500 сомониро ташкил медиҳад. 

 

Маҳмуд БАҲРОМ,  «Ҷумҳурият»