Рушди бахши хусусӣ ва фаъолияти соҳибкорӣ, аз ҷумла миёни бонувон, аз самтҳои афзалиятноки сиёсати иқтисодии ҷомеа маҳсуб мешавад. Ҳукумати кишвар бо мақсади дастгирии занони ҳунарманд, эҷодкор ва ташаббускор тадбирҳои ҳадафманд андешида, ҷиҳати баланд бардоштани мақоми зан дар ҷомеа пайваста ғамхорӣ мекунад. Ҳамеша кӯшиш ба харҷ дода мешавад, ки ин неруи созанда ва қишри фаъоли ҷомеа барои рушди устувори мамлакат сафарбар гардад. 

                                                       

Ассотсиатсияи миллии занони соҳибкори «Кадбону» ташкилотест, ки дар он гурӯҳи занони қавиирода  дар соҳаҳои гуногуни иқтисодиёти кишвар, дар фазои озоди соҳибкорӣ меҳнат мекунанд. Он  28 сол инҷониб фаъолият дошта, дар ин ҷода ба корҳои назаррас низ муваффақ шудааст. Ташкилот, асосан, бо табақаҳои осебпазири аҳолӣ кор карда, гурӯҳҳои мақсадноки он аз занони камбизоат, духтарони ятим ва маъюбон иборат аст.

Сабоҳат Раҳимзода, раиси ассотсиатсияи мазкур, узви раёсати Бизнес - ассотсиатсияи занони соҳибкори Осиёи Марказӣ ва Афғонистон, номзади илми таърих, доир ба фаъолияти ташкилот  андешаҳои худро чунин баён намуд: 

- Бо ғамхорӣ ва дастгириҳои пайвастаи Пешвои муаззами миллат дар кишвар заминаҳои хуби қонунгузорӣ дар самти таъмини  баробарии ҳуқуқҳои занон ва мардон ва рушди соҳибкории  бонувон муҳайё шудааст. Аз ҷумла, грантҳои президентӣ, 20 санади меъёрию ҳуқуқӣ, барномаҳои давлатӣ ва стратегияҳо ба ҳалли масъалаҳои гендерӣ ва рушди соҳибкории занон равона шудаанд. Дар 9 моҳи соли сипаришуда ба занони соҳибкор 2 миллиарду 363 миллион сомонӣ қарз дода шудааст. Дар давоми фаъолият ба зиёда аз 36,5 ҳазор зан ва оилаи онҳо ҷиҳати баланд бардоштани сатҳи зиндагиашон мусоидат намудем. Тамоми самтҳои фаъолияти мо ба тавонмандсозии занони соҳибкор равона гардидааст.

Боиси сарфарозист, ки теъдоди занони соҳибкор тайи солҳои соҳибистиқлолӣ аз 2 дарсади солҳои аввал ба 27 дарсад (даҳ баробар)  афзуд. Айни ҳол зиёда аз 3 ҳазору 480 нафар зан бо маҳорати баланди кордонӣ корхонаҳои худро сарварӣ мекунанд. Соҳибкорзанони муваффақи аъзои ташкилот - Файзимо Иброҳимова, Ҳидоят Рафиева, Шаҳло Ватанова, Нафиса Имронова, Насима Баҳромова, Набот Додхудоева, Ҳусния Шоинова, Зулайхо Тиллоева, Манзура Ғафурова, Раъно Бобоева, Гулбону Наврӯзова ва садҳои  дигарро номбар кардан мумкин аст, ки ҳоло номбардори миллатанд. Онҳо бо корҳои шоиста, ҳунару маҳорат ва заҳмату меҳнати шабонарӯзии хеш барои рушд ва муаррифии кишвар ҳиссаи худро мегузоранд.

Ассотсиатсия аъзои 8 Шурои ҷамъиятии сохторҳои ҳукуматӣ ва байналмилалӣ, аз ҷумла узви Гурӯҳи корӣ оид ба дастгирии занони соҳибкор дар назди Кумитаи давлатии сармоягузорӣ ва идораи амволи давлатии ҷумҳурӣ, узви Шурои занони соҳибкор дар назди Кумитаи кор бо занон ва оилаи назди Ҳукумати кишвар мебошад ва бо онҳо  ҳамкории зич дорад.

Ассотсиатсия дар давраи фаъолият 20 лоиҳаро дар амал татбиқ  намуд, ки ба баланд бардоштани сатҳи зиндагии бонувон ва оилаҳои онҳо мусоидат намуд. Аз ҷумла, лоиҳаи "Ҳаёти шоиста барои духтарони ятим"ба он мусоидат намуд, ки 120 нафар духтарони ятим асосҳои соҳибкориро омӯхтанд ва ихтисоси қаннодиро аз худ карданд. 

 

Матлубаи АБДУҚАҲҲОР, 

«Ҷумҳурият»