Дар Китобхонаи миллии Тоҷикистон 9 март бо иштироки Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ Иҷлосияи VI Маҷмаи умумии «Форуми раисони шаҳрҳои Осиё» ба кор оғоз намуд. Дар ин ҳамоиши муҳим намояндагони Ҳукумат ва Дастгоҳи иҷроияи Президенти Ҷумҳурии Тоҷикистон, роҳбарони вазорату идора, корпусҳои дипломатӣ, Дабири кулли Созмони «Форуми раисони шаҳрҳои Осиё», роҳбарону намояндагони беш аз 40 шаҳри қитъаи Осиё ба таври ҳузурӣ ва маҷозӣ иштирок намуданд.

 

Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ зимни паёми шодбошӣ ташрифи меҳмононро ба пойтахти Ҷумҳурии Тоҷикистон хайрамақдам гуфта, баргузории иҷлосияи навбатии Созмонро дар ибтидои фасли зебои баҳор ва арафаи Ҷашни Наврӯз аз ояндаи дурахшон ва таҳкиму густариши робитаҳои бисёрҷониба миёни шаҳрҳои Осиё арзёбӣ намуд.

Таъкид  шуд, ки имрӯз шаҳри Душанбе узви Ассамблеяи байналхалқии пойтахтҳо ва бузургшаҳрҳо (Мегаполис), Ташкилоти байналхалқии бародаршаҳрҳо, шаҳрҳои Муттаҳида ва ҳокимиятҳои маҳаллӣ ва Федератсияи ҷаҳонии шаҳрҳои сайёҳӣ буда, айни замон бо 20 шаҳри қитъаҳои Осиё, Аврупо, Амрико ва Африқо муносибатҳои дӯстона ва бародарона дорад. Шаҳри Душанбе бо дарназардошти имконияту дастовардҳо солҳои охир ҳамчун макони амнтарин, беҳтарин шаҳри сайёҳӣ ва гаштугузори шабона, инчунин, пойтахти фарҳангии кишварҳои минтақа пазируфта шуд.

Тайи ду рӯз пойтахти Ҷумҳурии Тоҷикистон – шаҳри Душанбе ба майдони бузурги мубоҳисаҳо ва макони муколамаи шаҳрҳо табдил меёбад.

Дар иҷлосия иштирокчиёни он дар 5 ҷаласаи пленарӣ оид ба мавзуъҳои «Шаҳри ҳушманд» («Смарт сити»), «Саёҳати шаҳрӣ», «Устувории шаҳрӣ», «Беҳтарсозии шаҳрӣ» ва «Саломатии шаҳрӣ» мубодилаи афкор намуданд.

Сардори шуъбаи иттилооти дастгоҳи раиси шаҳри Душанбе Ҷамшед Олимов иброз дошт, ки дар ҳошияи кори иҷлосия якчанд вохӯриҳои дуҷонибаи роҳбарони шаҳрҳои иштирокчӣ дар ҷараёни баргузории он иштирокчиён бо дастовардҳои пойтахт тайи даврони соҳибистиқлолӣ шинос гашта, аз якчанд маконҳои таърихӣ ва корхонаҳои истеҳсолии мамлакат дидан мекунанд.

Ҷойи таъкиди хос аст, ки Форуми раисони шаҳрҳои Осиё ҳамчун Созмони байналмилалии ғайриҳукуматӣ соли 2008 бо пешниҳоди Созмони мазкур зимни Ассамблеяи парлумонҳои Осиё таъсис дода шудааст.

Шиори Форуми раисони шаҳрҳои Осиё чунин аст: «Осиё барои шаҳрвандон: ҳамгироӣ барои зиндагии беҳтар» ва мақсади асосии он – рушди ҳамкорӣ ва якпорчагии шаҳрҳо ва шаҳрвандони Осиё.

Гуфта шуд, ки айни ҳол 96 шаҳр аз 34 давлати дунё узви Форуми раисони шаҳрҳои Осиё мебошад. Иҷлосияи VI  Маҷмаи умумии «Форуми раисони шаҳрҳои Осиё» дар шаҳри Душанбе ду рӯз идома ёфта,  бо қабули Эъломияи Душанбе ҷамъбаст мегардад.

Иштирокчиён эътимод бар он намуданд, ки Иҷлосияи VI Маҷмаи умумии  «Форуми раисони шаҳрҳои Осиё» ҷиҳати муттаҳид намудани талошҳои роҳбарони шаҳрҳо барои роҳандозии иқдомоти боз ҳам фаъолтар ва андешидани тадбирҳои заруриву муносиб саҳми сазовор мегузорад.

 

"ҶУМҲУРИЯТ"