ОДАМКУШӢ

Қотил 23 сол паси панҷара рафт

Бо ҳукми коллегияи судӣ оид ба парвандаҳои ҷиноятии Суди Олии Ҷумҳурии Тоҷикистон шаҳрванд Ҷӯрабек Набиев барои куштани одам бо бераҳмии махсус (моддаи 104 қисми 2 банди «е» Кодекси ҷиноятӣ) 23 сол аз озодӣ маҳрум шуд.

Тибқи иттилои маркази матбуоти Прокуратураи генералӣ, маҳкумшуда 3 декабри соли 2021 дар заминаи рашк шаҳрванд А. Содиқовро бо зарби табар сахт маҷруҳ карда, ӯро бо бензин оташ задааст. Дар натиҷа, ҷабрдида ҷароҳатҳои вазнин бардошта, дар беморхона ба ҳалокат расидааст.

Баъд аз ин амали ҷинояткорона Ҷ. Набиев бо мақсади аз ҷавобгарии ҷиноятӣ дур мондан худро ба дор кашида, мехост худкушӣ намояд. Вале ҳамсояҳо аз ин моҷаро огоҳ шуда, ӯро аз банд раҳо карданд, ки акнун муҳлати адои ҷазоро дар муассисаи ислоҳии дорои низоми сахт сипарӣ хоҳад кард.

 

 

ИФРОТГАРОӢ

Мубаллиғи экстремизм аз озодӣ маҳрум шуд

Суди шаҳри Ваҳдат бо дастрасии моддаи 3073 қисми 2 Кодекси ҷиноятӣ Раҳмонзода Беҳрӯзи Абдуллоҷонро барои ташкили фаъолияти ташкилоти экстремистӣ (ифротгароӣ) ба муҳлати 5 сол равонаи зиндон кард.

Дар рафти тафтишоти пешакӣ ва баррасии судӣ муайян шудааст, ки Беҳрӯзи Абдуллоҷон барномаҳои дорои мазмуни ифротгароиро, ки аз ҷониби саркардагони ташкилотҳои террористӣ - экстремистии ҳизби наҳзати исломӣ ва «Ҳаракати Толибон» таҳияву дар интернет пахш мешаванд, мунтазам тамошо намуда, тавассути саҳифаи шахсиаш дар шабакаҳои иҷтимоӣ онҳоро ҳадафмандона паҳн намудааст. 

Дар ин бора маркази матбуоти Прокуратураи генералӣ хабар дод.

 

 

ҚАЛЛОБӢ

Фиребгар ба дасти милитсия афтод

Кормандони мақомоти корҳои дохилӣ дар шаҳри Истаравшан алайҳи як сокини шаҳр, ки маркази матбуоти ВКД аз ӯ марди 65-сола ном мебарад бо моддаи 247 қисми 4 Кодекси ҷиноятӣ парвандаи ҷиноятӣ оғоз намудаанд.

Ин мард дар қаллобӣ гумонбар шуда, аз моҳи апрели соли 2017 то моҳи декабри соли 2019 бо роҳи фиреб ба боварии зани 38-солаи сокини шаҳри Истаравшан даромада, аз ӯ 70 ҳазору 500 сомонӣ ва 8 ҳазору 450 доллари амрикоӣ гирифта, то ҳол маблағҳояшро барнагардондааст.

Ҳоло, вобаста ба ин ҳолат тафтишот идома дошта, тибқи муқаррароти ин банди қонун айбдоршавандаро ҷазо дар намуди ҷарима ба андозаи аз якҳазору чорсаду шаст то дуҳазору яксаду навад нишондиҳанда барои ҳисобҳо ё маҳрум сохтан аз озодӣ ба муҳлати аз ҳашт то дувоздаҳ сол таҳдид мекунад.

 

Шуъбаи ҳуқуқи рӯзномаи «Ҷумҳурият»