ҳуқуқ
ҶИНОЯТ ВА ҶАЗО
ҚОТИЛИ ФИРОРӢ
боздошту истирдод ва 22 сол зиндонӣ шуд
Маркази матбуоти Прокуратураи генералии Ҷумҳурии Тоҷикистон аз ҳабси нафаре хабар дод, ки ҳанӯз соли 2006 як сокини шаҳри Панҷакентро ба қатл расонда буд.
Тибқи иттилои манбаъ, маҳкумшуда Сироҷиддин Суяров, ки дар яке аз қисмҳои ҳарбии Қӯшунҳои сарҳадии КДАМ ҳамчун сарбози қаторӣ хидмат мекард, 20 августи соли 2006 дар деҳаи Чилчанори шаҳри Панҷакент шаҳрванд Х. Норбоевро ба ҳалокат расонда, худи ҳамон шаб аз Тоҷикистон фирор ва дар Ҷумҳурии Қазоқистон паноҳ бурдааст. Ҷинояткор 30 сентябри соли 2021 аз ҷониби мақомоти ҳифзи ҳуқуқи ин кишвар боздошт ва ба Ҷумҳурии Тоҷикистон истирдод шуд.
Тафтиши пешакии парвандаи ҷиноятӣ нисбат ба С. Суяровро Сарпрокуратураи ҳарбӣ бо моддаи 104 қисми 2 (одамкушӣ) Кодекси ҷиноятӣ анҷом дода, айбдоршаванда бо ҳукми Коллегияи ҳарбии Суди Олии Ҷумҳурии Тоҷикистон ба муҳлати 22 сол аз озодӣ маҳрум гардид.
РИШВА
раиси ҷамъияти «Матлубот»-ро ба толори суд бурд
Агентии назорати давлатии молиявӣ ва мубориза бо коррупсия парвандаи ҷиноятӣ нисбат ба Меҳринисо Раҳимоваро бо моддаи 279 қисми 3 (ришвадиҳии тиҷоратӣ) Кодекси ҷиноятӣ анҷом дода, бо тасдиқи фикри айбдоркунӣ ба суд ирсол намуд.
Дар ин бора маркази матбуоти агентӣ хабар дода, зикр намуд, ки Меҳринисо Раҳимова «дар вазифаи раиси раёсати ҷамъияти «Матлубот»-и шаҳри Кӯлоб кор карда, дар давраи фаъолияти кориаш даст ба содир намудани ҷинояти қасдона задааст». Тавре гуфта мешавад, ӯ барои вобаста намудани нуқтаи савдо ба шаҳрванд «А» аз ӯ 27000 сомонӣ талаб намуда, дар навбати аввал 10000 сомонӣ гирифта, ҳангоми гирифтани 17000 сомонии дигар дастгир шудааст.
ДУЗДӢ
Ҷавони 19-сола 75 ҳазор сомониро дуздида ба дасти милитсия афтод
Кормандони мақомоти корҳои дохилӣ дар ноҳияи Файзобод ҷавони 19 – солаеро боздошт намуданд, ки дар содир намудани ҷинояти дуздӣ гумонбар мешавад.
Бино ба иттилои сомонаи Вазорати корҳои дохилӣ, гумонбар 23 марти соли ҷорӣ бо роҳи пинҳонӣ ба манзили истиқоматии зани 41-солаи сокини ҳамин ноҳия даромада, аз дохили сандуқи соҳибхона 75 ҳазор сомониро дуздидааст, ки нисбат ба ин ҳолат тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 28.03.2022 №: 58 - 59 Мутолиа карданд: 3100