Корхона аз тарафи соҳибкори маҳаллӣ Абдумубин Абдушукуров таъсис ёфта, дар он дар як шабонарӯз то 30 тонна равғани рустанӣ коркард мешавад. Равғани хоми офтобпараст, пахта, рапс ва соя аз корхонаҳои равғанкашии ватанӣ, инчунин, аз хориҷи мамлакат ба корхона дастрас гардида, бо истифода аз дастгоҳу таҷҳизоти ҳозиразамон дар 7 марҳила ва дар шароити пӯшида поксозӣ мешавад. Дар натиҷаи полоиши чандкарата равғани безарар, баландсифат ва ҷавобгӯ ба стандарти байналмилалӣ омода мегардад. Дар ҶДММ «ЗирвЭко» 40 сокини маҳаллӣ бо ҷойи кори доимӣ таъмин гардидааст.

- Барои нигоҳдории равған дар саҳни корхона, инчунин, дохили бинои асосӣ зарфҳои махсуси ба ҳама ҳолат тобовар гузошта шудаанд, ки ҳаҷми умумии ғунҷоиши онҳо ба 400 тонна баробар аст. Баъди коркарди пурра равғани рустанӣ бо тамғаи «Олия» ва «Софӣ» дар ҳаҷми аз 0,5 то 5 литр бандубаст мешавад. Маҳсулоти корхона, асосан, дар бозори дохилӣ ба фурӯш рафта, ҳамчунин, ба кишварҳои Осиёи Марказӣ ва Ҷумҳурии Исломии Афғонистон содирот мешаванд, - гуфт Маъмури Юсуфзод.

Дар анбори корхона 25 тонна равған ва 3 000 тонна ашёи хом захира шудааст.

Фирдавс Шарифзода таъкид дошт, ки дар Тоҷикистон таъмини амнияти озуқаворӣ аз ҷумлаи ҳадафҳои афзалиятноки стратегӣ ба ҳисоб рафта, дар ин бобат баҳри расидан ба мақсадҳое, ки ба беҳтаршавии зиндагии сокинони кишвар мусоидат мекунанд, тадбирҳои зиёд андешида мешаванд. Дар ин давра барои расидан ба ин мақсад санадҳои меъёрии ҳуқуқӣ, аз ҷумла даҳҳо барномаҳои давлатӣ қабулу амалӣ гардида, дар оғози соҳибистиқлолии мамлакат бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар аввалин фурсат заминҳои корам, ки бо номи заминҳои президентӣ машҳуранд, ба аҳолии кишвар дода шуданд. Соҳибкорони ватанӣ ва хоҷагиҳои деҳқонӣ бо истифода аз имтиёзоти давлату Ҳукумат дар заминҳои кишоварзӣ маҳсулоти ғалладона ва дигар зироатҳоро кишт карда, ҳосили дилхоҳ ба даст меоранд.