Дастгирии ятимону бепарасторон ва дигар оилаҳои ниёзманд аз фазилатҳои неки инсонист, ки дар арафаи ҷашну маросимҳо дар кишварамон ба ҳукми анъана даромадааст. Дар пайравӣ аз ташаббусҳои хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарияти Мақомоти иҷроияи ҳокимияти давлатии шаҳри Кӯлоб дар иду ҷашнҳо ба табақаи эҳтиёҷманди шаҳр мунтазам кумак мерасонад. 

Ин навбат дар арафаи Ҷашни Наврӯз роҳбарияти шаҳр аз шароити истироҳату фароғати тарбиятгирандагони мактаб-интернати ёрирасони № 1 боздид карда, ба тарбиятгирандагон як миқдор орд, равған, шакару биринҷ, гӯшт, пиёз, картошка, шириниҳо, инчунин, кумаки молиявӣ расонданд.

Раиси шаҳр Бахтиёр Назарзода иброз дошт, ки  ятимону бепарасторон ва шахсони ниёзманд зери таваҷҷуҳи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, Сарвари давлат пайваста ба шахсони яккаву танҳо ва табақаи эҳтиёҷманд ғамхорӣ менамоянд, ки ин яке аз фазилатҳои неки инсонӣ ба шумор меравад.

Ҳамчунин, роҳбарияти шаҳр 14 собиқадори меҳнатро аёдат карда, ба онҳо кумакҳои молиявӣ, маводи хӯрокворӣ ва Сипоснома дастрас намуданд.

Иқдомҳои хайру савоб боиси хушҳолии ятимону бепарасторон, собиқадорони меҳнат ва оилаҳои ниёзманд гардида, онҳо миннатдории самимии худро махсусан, ба Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иброз намуданд.

 

Далер ШАРИФОВ, мудири бахши матбуоти МИҲД-и шаҳри Кӯлоб