Бо қарори Ҳукумати Ҷумҳурии Тоҷикистон аз 28 марти соли 2022, №123 тасдиқ шудааст

 

 

1. МУҚАРРАРОТИ УМУМӢ

1. Қоидаҳои пешбурди феҳристи хизматрасониҳои давлатӣ (минбаъд – Қоидаҳо) тартиби пешбурди феҳристи хизматрасониҳои давлатӣ ва сохтори онро муайян мекунанд.

2. Вазифаи асосии пешбурди феҳрист муайян ва дохил кардани маълумот дар бораи хизматрасониҳои давлатӣ ба феҳрист, сода кардани дастрасӣ ба хизматрасониҳои давлатӣ барои хизматрасонандаҳо мебошад.

3. Мақсади пешбурди феҳрист:

- баланд бардоштани самаранокӣ ва сифати фаъолияти хизматрасонанда;

- таъмини дастрасӣ ва шаффофияти  маълумот дар бораи хизматрасониҳои давлатӣ ба гирандагони хизматрасонӣ;

- баҳисобгирӣ ва таҳлили хизматрасониҳои давлатӣ.

4. Феҳрист бо забонҳои давлатӣ ва русӣ таҳия мегардад.

 

2. ТАРТИБИ ПЕШБУРДИ ФЕҲРИСТ

5. Тартиби пешбурди феҳрист марҳилаҳои зеринро дар бар мегирад:

- таҳлили санадҳои меъёрии ҳуқуқии Ҷумҳурии Тоҷикистон бо мақсади муайян намудани хизматрасониҳои давлатӣ;

- дар асоси таҳлили гузаронида муайян намудани номгӯи хизматрасониҳои давлатие, ки бояд ба феҳрист дохил карда шаванд;

- ба феҳрист ворид намудани хизматрасониҳои давлатии муайяншуда, маълумот дар бораи хизматрасониҳои давлатӣ;

- гузаронидани мониторинги мунтазами феҳрист ҷиҳати навсозии мундариҷаи он;

- навсозии маълумот дар бораи хизматрасониҳои давлатӣ, ки ба феҳрист дохил карда шуданд.

6. Пешбурди феҳрист аз тарафи мақоми ваколатдори давлатӣ амалӣ мегардад.

7. Барои ворид кардани тағйирот ва (ё) иловаҳо ба феҳрист, мақомоти иҷроияи марказӣ ва маҳаллии ҳокимияти давлатӣ бояд:

- ҳар сол барӯйхатгирии маълумот, оид ба хизматрасониҳои давлатӣ дар феҳристро анҷом диҳанд;

- ба мақоми ваколатдори давлатӣ пешниҳодҳоро оид ба ворид намудани тағйирот ба феҳрист тибқи замимаи 1 Қоидаҳо ва (ё) маълумот дар бораи ворид намудани иловаҳоро ба феҳрист тибқи замимаи 2 Қоидаҳо пешниҳод намоянд. Дар сурати зарурат мақоми ваколатдори давлатӣ дар асоси пешниҳоди мақомоти иҷроияи марказӣ ва маҳаллии ҳокимияти давлатӣ лоиҳаи дахлдори санади меъёрии ҳуқуқӣ таҳия намуда, ба Ҳукумати Ҷумҳурии Тоҷикистон пешниҳод менамояд.  

8. Феҳрист аз тарафи Ҳукумати Ҷумҳурии Тоҷикистон тасдиқ мегардад. 

 

3. СОХТОРИ ФЕҲРИСТ

9. Феҳрист тибқи сохтори пешбининамудаи замимаи 3 Қоидаҳо таҳия карда мешавад.

10. Феҳрист инҳоро пешбинӣ мекунад:

- номгӯи хизматрасониҳои давлатӣ;

- маълумот дар бораи гирандаи хизматрасонӣ (шахси воқеӣ ва (ё) шахси ҳуқуқӣ);

- номгӯи мақомоти иҷроияи марказии ҳокимияти давлатӣ, ки стандарти хизматрасонии давлатиро таҳия мекунад;

- номгӯи хизматрасонанда;

- номи ташкилотҳое, ки қабули аризаҳоро ба роҳ мемонанд ва натиҷаҳои пешниҳоди хизматрасонии давлатиро медиҳанд ва (ё) ба портали интернетии «Ҳукумати электронӣ» дар сурати пешниҳоди хизматрасонии давлатӣ дар шакли электронӣ нишон медиҳад;

- шакли хизматрасонии давлатӣ;

- пулакӣ ё ройгон будани хизматрасонии давлатӣ.

11. Таснифи феҳрист аз инҳо иборат аст:

- фаслҳо, ки гурӯҳбандии хизматрасониҳои давлатиро вобаста ба соҳаҳои муносибатҳои ҷамъиятӣ дар бар мегиранд;

- зерфаслҳо, ки гурӯҳбандии хизматрасониҳои давлатиро вобаста ба ҳолати иҷтимоии гирандагони хизматрасонӣ ифода мекунанд;

- рақамҳои силсилавии хизматрасониҳои давлатӣ.

12. Ба хизматрасонии давлатӣ рамзи таснифшудаи инфиродии ҳаштрақама дар шакли аломати рақамӣ дода мешавад, ки аз рамзҳои ҳама сатҳҳои таснифи феҳрист ташаккул меёбад. Рамзи таснифшуда аз се қисм иборат аст:

- қисми аввал - аз 3 рақам иборат буда, фасли вобаста ба соҳаи муносибатҳои ҷамъиятиро ифода мекунад;

- қисми дуюм - аз 2 рақам иборат буда, зерфаслро вобаста ба вазъи зиндагии гирандаи хизматрасонӣ ифода мекунад;

- қисми сеюм - аз 3 рақам иборат буда, дар дохили зерфасл рақами силсилавии хизматрасонии давлатиро нишон медиҳад.

13. Рамзи таснифӣ ба хизматрасонии давлатӣ аз ҷониби мақоми ваколатдори давлатӣ дода мешавад.

14. Таснифоти феҳристи хизматрасониҳои давлатӣ аз рӯи сохтори он тибқи замимаи 4 Қоидаҳо тартиб дода мешавад.