Чанде қабл бо ҳукми суди шаҳри Ваҳдат Абдуалӣ Садиров, сокини ин шаҳр, барои қаллобӣ бо дастрасии моддаи 247 қисми 4 банди “б”  Кодекси ҷиноятӣ ба муҳлати даҳ солу шаш моҳ аз озодӣ маҳрум гардид. 

 

Тафтишот муайян кард, ки маҳкумшуда дар чанд маврид бо роҳи фиреб аз шаҳрвандон маблағҳои калон ситондааст. Ӯ зимни амалҳои қаллобона худро корманди мақомоти ҳифзи ҳуқуқ муаррифӣ карда, бо ин роҳ ба боварии сокинон даромадааст. Чунончи, номбурда соли 2020-ум ба назди шаҳрванд З. Исмоилова рафта, гуфтааст, ки барои гум кардани шаҳодатномаи таваллуд нисбаташ парвандаи ҷиноятӣ оғоз шудааст. Тавре гуфтем, судшуда худро корманди мақомоти ҳифзи ҳуқуқ муаррифӣ намуда, қавл додааст, ки бар ивази 2000 сомонӣ метавонад, парвандаро қатъ намояд. Ба ҳамин далел, аз ин шаҳрванд 2000 сомонӣ гирифта, ба манфиати шахсиаш сарф намудааст. 

Ғайр аз ин, А. Садиров кирдори ҷинояткоронаи худро идома дода, 14 марти соли 2021 ба боварии М. Расулов даромада, бо баҳонаи аз ҳабс озод кардани фарзандаш маблағи 300 ҳазор сомонӣ талаб намудааст. Баъд аз гирифтани маблағ ҷойи ҳодисаро тарк намуда, минъбад телефони мобилиашро хомӯш кардааст. 

Ҳамин тариқ, номбурда бо амалҳои ғайриқонунияш ба ҷабрдидагон зарари махсусан калони моддӣ расонда, оқибат ба ҷазои аъмоли мардумфиребонааш расид ва акнун муҳлати адои ҷазоро дар муассисаи ислоҳии низомаш пурзӯр сипарӣ хоҳад кард.

Манзур аз ба қалам додани кирдорҳои ҷинояткоронаи ин нафар дар он аст, ки сокинон бояд дар баробари чунин қаллобон эҳтиёткор бошанд ва ҳамагон бори дигар бидонанд, ки ҳеҷ як амали зиддиқонунӣ бе ҷавбогарӣ нахоҳад монд. 

 

Х. ҲАБИБУЛЛОЗОДА, муовини раиси суди шаҳри Ваҳдат