INTERFAX.RU. Президенти Россия Владимир Путин дар космодроми «Восточный» бо Президенти Беларус Александр Лукашенко мулоқот хоҳад кард.

Бар асоси ҷадвали Президент, ки дар барномаи «Москва. Кремл. Путин» - и шабакаи телевизионии «Россия-1» эълом шуд, Путин ва Лукашенко  12 апрел дар Рӯзи кайҳоннавардон аз космодроми «Восточный» дидан мекунанд. Тавре пешбинӣ гашта буд, роҳбарон бо рафти сохтмони космодром шинос шуда, бо коргарон суҳбат мекунанд.

Қарор аст, дар музокирот авзоъ дар атрофи Украина бо назардошти хоҳиши Минск барои пайвастан ба раванди музокирот баррасӣ шуда, дар поёни мулоқот роҳбарони ду давлат нишасти хабарии муштарак баргузор намоянд.

 

 

 

Туркманистон ва Россия ният доранд, гардиши молро афзоиш диҳанд

 

Мир24. Сердар Бердимуҳамедов дар пойтахти Туркманистон муовини Раиси Ҳукумати Россия Алексей Оверчукро, ки бо сафари корӣ дар Ашқобод қарор дорад, ба ҳузур пазируфт.  

Дар мулоқот зарурати афзоиши ҳаҷми тиҷорати мутақобила, ҳавасмандгардонии фаъолияти сармоягузорӣ, инчунин, мусоидат ба робитаҳои мустақими доираҳои соҳибкории ду кишвар баррасӣ шуданд. Оверчук, ҳамчунин, Роҳбари Ҷумҳурии Туркманистонро бо пирӯзии боварибахшаш дар интихоботи президентӣ табрик гуфт.

Ёдовар мешавем, ки қабл аз ин, ҳайати Россия дар вазорату идораҳои соҳавии Туркманистон як қатор мулоқотҳо доир карда буд. Ҷонибҳо масъалаҳои ҳамкорӣ дар соҳаҳои энергетика, логистика, сохтмон, геология, инчунин, зарурати таҳкими робитаҳои тиҷоратӣ ва марказҳои фарҳангии давлатҳоро баррасӣ карданд.

 

 

Макрон пас аз шумурдани 95 дарсади овозҳо дар даври аввали интихоботи президентии Фаронса пешсаф аст

ТАСС. Президенти феълии Фаронса Эммануэл Макрон, тибқи маълумоти пешакӣ, дар даври аввали интихоботи президентӣ пас аз коркарди 95 дарсади бюллетен 27,41 дарсади раъйро ба даст оварда, пешсаф аст. Дар ин бора сомонаи Вазорати корҳои дохилии ҷумҳурӣ хабар додааст.

Дар ҷойи дуюм номзад аз Ҳизби  «Иттиҳоди миллӣ» Марин Ле Пен, ки 24,03 дарсади овозҳоро ба даст овардааст, қарор дорад.