Соли гузашта дар шаҳри Конибодом ба маблағи 320 миллиону 930 ҳазор сомонӣ маҳсулоти саноатӣ истеҳсол гардидааст, ки ин нишондиҳанда  нисбат ба соли 2020 бештар аз 100 дарсадро ташкил медиҳад. Аммо ин рақам назар ба ҳадафу мақсадҳои пешгузошташуда  ҳанӯз қонеъкунанда нест. Ба замми ин, дар ин давра аз 47 корхонаи саноатӣ  8-тоаш фаъолият накарда, тавлидоти 10-тои дигар коҳиш ёфтааст. 

Аз ин рӯ, роҳбарияти шаҳр тасмим гирифтааст, ки дар доираи ҳадафи чоруми миллӣ эълон гардидани саноатикунонии босуръат иқтидорҳои қаблии соҳа, аз ҷумла корхонаҳои замоне машҳури ҶС “Ресмон”, ҶС “Ассор”, ҶС “Конибодом маснуот”, консервбарорӣ, “Ҳусноро”, “Бодом”- ро пурра барқарор намояд. Бино ба иттилои бахши иқтисодии Мақомоти иҷроияи ҳокимияти давлатии шаҳр соли сипаришуда  ҳиссаи соҳаи саноат дар пешрафти иқтисодиёт қариб 18 дарсадро ташкил додааст, ки дар муқоиса ба имкониятҳои мавҷуда ночиз мебошад. 

Абдуссалом Тухтасунзода, раиси шаҳр, иброз дошт, ки бо назардошти эълон шудани солҳои 2022-2026 – Солҳои рушди саноат  Мақомоти иҷроияи ҳокимияти давлатии шаҳр тасмим гирифтааст, ки  дар заминаи технологияи пешқадаму инноватсионӣ 60 корхонаи нав бунёд намуда, ба ин васила, 1200 ҷойи нави корӣ таъсис хоҳад ёфт. Татбиқи нақшаи мазкур шароит фароҳам меорад, ки  шаҳри Конибодом боз дар солҳои наздик ба яке аз минтақаҳои рушдкардаи саноат мубаддал гардад. 

Соли равон бо ҷалби соҳибкорони ватанӣ ташкили коргоҳҳои истеҳсолии воридотивазкунанда дар назар буда, дар маҷмуъ,  таъсиси 150 ҷойи нави кор пешбинӣ мешавад. Дар солҳои минбаъда бунёди корхонаҳо боз ҳам рушду равнақ хоҳад ёфт. Масалан, ҶДММ “Шариф”  дар масоҳати беш аз 9 гектар бунёд мегардад, ки аз ҷиҳати аҳамияти иқтисодӣ бузургтарин корхона дар зарфи чанд соли охир хоҳад буд. Дар назди ин маҷмаа ташкили коргоҳҳои коркарди ниҳоии пахта,  ресандагӣ, ҷуроббофӣ, истеҳсоли равған ва боз коргоҳҳои хурди иловагӣ ба фаъолият мепардозанд. Корхонаи мазкур соли 2025 ба фаъолияти ҳамаҷониба оғоз менамояд.

Ниҳоят соҳибмулкони корхонаи равғанбарории “Ассор”, ки қаблан кишвар ва навоҳии наздики ҷумҳурии ҳамсояро бо равғани аз лиҳози экологӣ тоза таъмин мекард, барои татбиқи лоиҳаи нави тиҷоратию истеҳсолӣ ба маблағи то 40 миллион сомонӣ бо воридоти  технологияи нав талош доранд. Дар ин радиф, корхонаи "Бодом" – истеҳсолкунандаи қисмҳои техникии нақлиёти автомобилӣ тадриҷан ба барқарорсозии иқтидори пештараи худ саъй менамояд. 

Рустамҷон Қодиров, ки дар ҷодаи иқтисодиёти шаҳр собиқаи кории зиёда аз 50-сола дорад, муътақид аст, ки Конибодом дорои тамоми захираву имконияту шароитҳо буда, бо дастгирию ғамхориҳои давлату Ҳукумат дар муддати кӯтоҳ мақоми шаҳри неруманди саноатиро дарёфт мекунад. 

- Дурнамои рушди иқтисодиёти Конибодом ҳамоно аз истифодаи самараноки ду ашёи хоми саноатӣ: пахтакорӣ ва боғдорӣ вобаста мебошад. Ҳамоно бозори ҷаҳонӣ ба маҳсулоти ниҳоии боғдорӣ, зироат, консерву шарбатҳои гуногуни болаззати аз лиҳози экологӣ тоза, номгӯи зиёди маҳсулоти пахтагин  ниёз дорад. Мутаассифона,  феълан, бештари корхонаҳои истеҳсолӣ, ки дар шаҳр хусусӣ шудаанд, аз  фориғболиву бетарафии соҳибмулконашон фаъолият надоранд. Ҳол он ки дар ин инфрасохтори тайёр фақат бо навсозии таҷҳизот эҳёи истеҳсолот  имконпазир мебошад.  Моро зарур аст, дар зарфи панҷ соли оянда, ки ҳадаф рушди саноат қарор гирифтааст, тариқи таҷҳизондани корхонаҳои мавҷуда ва ташкили иқтидорҳои нав  Конибодомро ҳамчун шаҳри пуриқтидори саноатӣ шуҳратёр гардонем, - гуфт ӯ.   

 

Ҷовиди АШТӢ, “Ҷумҳурият”