ПОРА

боз як шахси мансабдорро ба толори суд бурд

Парвандаи ҷиноятӣ нисбат ба Бузургмеҳр Буриев, сардори шуъбаи бақайдгирии КДФ «Бақайдгирии молу мулки ғайриманқул» дар ноҳияи Варзоб, баъд аз анҷоми тафтиши пешакӣ бо тасдиқи фикри айбдоркунӣ ба суд фиристода шуд.

Дар ин бора маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод. Тибқи иттилои манбаъ, Бузургмеҳр Буриев зимни фаъолият дар ин мақом аз шаҳрванд «А» барои тайёр карда додани иқтибос ва варақаи бақайдгирӣ аз феҳрасти ягонаи молу мулки ғайриманқул ба манзили истиқоматии падараш ва мусоидат намудан баҳри ивази шиносномаи техникии манзили истиқоматӣ 4200 сомонӣ талаб намудааст. Номбурда аз ин маблағ 2700 сомониашро қаблан гирифта, ҳангоми гирифтани 1500 сомонии дигар  дастгир гардид.

Парвандаи ҷиноятӣ нисбат ба ӯ, бо моддаи 319 қисми 1 (гирифтани пора аз ҷониби шахси мансабдор) Кодекси ҷиноятӣ мавриди тафтишот қарор гирифтааст, ки ин банди қонун ҷазо дар намуди ҷарима ба андозаи аз се ҳазору шашсаду панҷоҳ то нуҳ ҳазору яксаду бисту панҷ нишондиҳанда барои ҳисобҳо ё маҳрум сохтан аз озодӣ ба муҳлати то панҷ солро пешбинӣ менамояд. 

 

 

ҚАЛЛОБӢ

Боздошти шахсе, ки барои аз ҷавобгарӣ озод намудан пул гирифтааст

Дар шаҳри Ваҳдат маъмурони милитсия марди 33-солаеро боздошт намуданд, ки дар содир намудани ҷинояти қаллобӣ гумонбар мешавад.

Боздоштшуда, ки сокини ҳамин шаҳр аст, моҳи марти соли ҷорӣ бо роҳи фиреб ба боварии як сокини дигари шаҳри Ваҳдат даромада, аз ӯ 55 ҳазору 460 сомонӣ гирифта ваъда кардааст, ки бародарашро аз ҷавобгарии ҷиноятӣ озод менамояд. 

Тавре маркази матбуоти Вазорати корҳои дохилӣ хабар медиҳад, ҳоло нисбат ба гумонбаршаванда бо моддаи 247 қисми 4 Кодекси ҷиноятӣ (қаллобӣ)  парвандаи ҷиноятӣ оғоз шуда, тафтишот идома дорад.

 

 

ДУЗДӢ

Милитсия ба дасти марди чорводузд завлона зад

Кормандони мақомоти корҳои дохилӣ дар шаҳри Конибодом ҳодисаи дуздиеро тафтиш мекунанд, ки дар он марди 35-солаи сокини ҳамин шаҳр гумонбар мешавад.

Бино ба иттилои маркази матбуоти Вазорати корҳои дохилӣ марди гумонбар 6 апрели соли ҷорӣ аз заминҳои деҳаи Санҷидзори шаҳри Конибодом  1 сар чорвои калони шохдорро дуздидааст.

Зарари расондашуда 10 ҳазор сомониро ташкил дода, нисбат ба ин ҳодиса бо моддаи 244 қисми 2 Кодекси ҷиноятӣ (дуздӣ) парвандаи ҷиноятӣ оғоз шудааст. 

 

Шуъбаи ҳуқуқи рӯзномаи «Ҷумҳурият»