Дар шаҳри Хуҷанд фаъолони вилоят натиҷаи рушди иқтисодӣ ва иҷтимоии хоҷагии халқро дар семоҳаи аввал мавриди баррасӣ ва таҳлил қарор доданд. Даврон Зоҳидзода, муовини раиси вилояти Суғд  дар иртибот ба ин масъала назди фаъолон гузориш дод. 

Мавсуф аз ҷумла, таъкид кард, ки дар давоми се моҳи сипаришудаи соли равон дар вилоят ҳаҷми маҳсулоти саноатӣ ба 5,4 миллиард сомонӣ баробар шуда, суръати афзоиш дар қиёс ба ҳамин давраи соли 2021-ум 122,5 дарсадро ташкил дод. Бо назардошти  вазъи кунунии иқтисодиёти мамлакат дар ин давра таваҷҷуҳи асосӣ ба истеҳсоли маҳсулоти воридотивазкунанда ва ба содирот нигаронидашуда равона гардид. Дар моҳҳои январ-марти соли 2022 - юм 229,3 ҳазор тонна семент ва 284,8 ҳазор тонна ангишт истеҳсол  шуда, суръати афзоиш мутаносибан 94,6 ва 113,2 дарсадро ташкил намудааст. Ҳамзамон, 1723 метри мураббаъ газвори пахтагӣ ва 784,3 тонна калоба истеҳсол гардид. Истеҳсоли маҳсулоти хӯроквории ивазкунандаи воридот сол ба сол тавсеа ёфта, дар 3 моҳи соли 2022 ба миқдори 67,1 ҳазор тонна орд ва 1459,1 тонна равғани рустанӣ истеҳсол шудааст. 

Тадбирҳои болозикр имкон доданд, ки саҳми вилояти Суғд дар ташаккулёбии ҳаҷми маҳсулоти саноати Ҷумҳурии Тоҷикистон ба 57,2 дарсад баробар гардад.

 Соли 2022 ба истифода додани 145 корхонаву коргоҳҳои нави саноатӣ бо 2904 ҷойи нави корӣ пешбинӣ гардида, дар натиҷаи роҳандозии саривақтӣ  давоми 3 моҳи соли 2022 дар миқёси вилоят 40 корхонаву коргоҳҳои нав бо 1677 ҷойи нави корӣ ба фаъолият шуруъ намуданд. 

Муовини раиси вилояти Суғд зикр дошт, ки соҳаи кишоварзӣ дар иқтисодиёти вилоят яке аз самтҳои асосӣ ва калидӣ маҳсуб ёфта, дар 3 моҳи соли ҷорӣ дар ҳамаи шаклҳои хоҷагидории вилоят ба маблағи  891,7  миллион сомонӣ маҳсулоти кишоварзӣ истеҳсол шуда, суръати афзоиш  нисбат ба ҳамин  давраи соли гузашта 111,8 дарсад таъмин гардид. 

Раиси вилояти Суғд Раҷаббой Аҳмадзода дар ҷараёни натиҷагирӣ аз семоҳаи ҳамаи самтҳои хоҷагии халқ аз  масъулини соҳоти саноат, кишоварзӣ, маорифу тандурустӣ ва ҳифзи ҳуқуқ ҷиҳати пиёдасозии он дастуру супориш ва эродҳои Президенти мамлакат муҳтарам Эмомалӣ Раҳмон дар маҷлиси фаъолони вилоят дар моҳи феврали соли равон ба хотири боз ҳам боло бардоштани истеҳсоли маҳсулоти ҷавобгӯй ба талаботи меъёрҳои ҷаҳонӣ, таъмини муътадили бозори  дохилӣ бо маводи ғизоӣ, сабзавоту меваҷот, захираи маводи озуқа, вусъат бахшидани иқдомҳо  баҳри амалишавии Барномаи солҳои 2022-2026 – Солҳои рушди саноат, баланд бардоштани сифати таълим дар муассисаҳои таҳсилоти миёнаи умумӣ  ва хизматрасонӣ дар муассисаҳои тиббии вилоят, пешгирии ҷиноят ва роҳҳои муассири  он пурсиш ба амал овард. 

 

Ҷовиди АШТӢ, “Ҷумҳурият”