Воқеан, ҳамасола шанбеи ҳафтаи сеюми моҳи апрел ҷашн гирифтани Рӯзи пойтахти Ҷумҳурии Тоҷикистон - шаҳри Душанбе боиси фараҳмандӣ аст. Пеш аз ҳама, ба ин хотир, ки ба эътирофи умум, айни замон шаҳри Душанбе - пойтахти кишвари маҳбуби мо рӯз ба рӯз ободу зеботар мегардад ва дар шумори шаҳрҳои дар ҳоли тараққӣ қарор дорад. Ҳоло меҳмонони дохиливу хориҷие, ки аз ин шаҳри зебову гулпӯш боздид ба амал меоваранд, шоҳиди он ҳастанд, ки дар зарфи чанд соли охир дар ҳақиқат Душанбе аз файзи сиёсати созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва кӯшишу талошҳои раиси шаҳри Душанбе Рустами Эмомалӣ аз ҳар ҷиҳат рушд ёфта, бо қомат афрохтани чандин коху иншооти муҳими фарҳангӣ, боғу гулгаштҳо симои зеботар касб кардааст.

Воқеан, дар зарфи 4 - 5 соли охир тарҳу симои меъмории шаҳр босуръат тағйир ёфта, муҳимтарин ва наҷибтарин суннатҳои фарҳанги шаҳрсозӣ рушду такомул пайдо карданд. Кӯшишу талош ва иқдомҳои навоваронаи раиси шаҳри Душанбе имконият фароҳам овард, ки дар кӯтоҳтарин фурсат падидаҳои нодири фарҳанги шаҳрсозии ҷаҳонӣ дар саросари шаҳри Душанбе мавриди татбиқ қарор дода шаванд. 

Як нукта қобили зикри хос аст, ки эълон шудани солҳои 2019-2021 ҳамчун Солҳои рушди деҳот, сайёҳӣ ва ҳунарҳои мардумӣ ба он мусоидат кард, ки имкониятҳои фаровони рушди сайёҳӣ дар пойтахти Тоҷикистон босамар истифода шуда, аз ин роҳ меҳмонони зиёде аз гӯшаву канори олам ба шаҳри Душанбе ташриф оварданд. 

Бо нуфузи бештар касб кардани Ҷумҳурии Тоҷикистон дар арсаи байналмилалӣ ва ҳамчун кишвари ташаббускор эътироф шудани он шаҳри Душанбе ҳарчи бештар мавриди таваҷҷуҳ ва мизбони ҳамоишҳои сатҳи баланди минтақавию ҷаҳонӣ мегардад, ки мо солҳои охир шоҳиди суръат пайдо кардани ин раванд ҳастем. Ҳузури чеҳраҳои сатҳи баланди сиёсати ҷаҳонӣ, роҳбарони созмонҳои бонуфуз, сарварони сиёсии кишварҳои мухталифи олам ба Тоҷикистон, ки, пеш аз ҳама, фурсати бештари сафари онҳо дар шаҳри Душанбе сурат мегирад, борҳо дар сатҳи ҷаҳонӣ мақоми пойтахти Тоҷикистонро муаррифӣ намудааст. Зеро табиист, ки аксари онҳо таассуроти хешро дар бораи пойтахти кишвари азизи мо ба дигарон мегӯянд, ба симои зоҳирӣ, фарҳанги шаҳрдории мардум баҳо медиҳанд.

Маҳз, мизбонии чорабиниҳои сатҳи баланди ҷаҳонӣ боис гардид, ки шаҳри Душанбе ба унвони пойтахти фарҳангии ташкилоту созмонҳои сатҳи ҷаҳонӣ эълон шавад. Аз ҷумла, соли гузашта ба шаҳри Душанбе мақоми пойтахти фарҳангии Иттиҳоди Давлатҳои Мустақил дода шуд ва маросими расмии эълони он дар остонаи Наврӯзи хуҷастапай баргузор гардида буд. Ширкати фаъоли аҳли ҳунари кишварҳои Россия, Беларус ва дигар ҷумҳуриҳои ИДМ дар рӯзҳои баргузории ин рӯйдоди муҳим саҳифаҳои тозаеро дар самти робитаҳои фарҳангии шаҳри Душанбе бо пойтахти кишварҳои дигар боз намуд. 

Шукуфоии ҳамарӯза ва нуфузи баланд касб кардани шаҳри Душанбе бо роҳнамоии Сарвари давлат ва амалкарди муваффақонаи раиси ҷавону оянданигари он Рустами Эмомалӣ муаяссар гардида, дурнамои боз ҳам шоистаро дар пай дорад. Барои расидан ба зинаҳои нави рушд сокинони шаҳри Душанбе бояд худро вазифадор шуморанд, ки бо эҳсоси баланди шаҳрвандӣ ва сокини шарафманди ин шаҳри бузурги ҷаҳонӣ будан, дар роҳи расидан ба ормонҳои бузург ва саҳм гузоштан дар барномаҳои ояндасози раиси шаҳр Рустами Эмомалӣ саҳми худро гузоранд. Дар ин сурат, мо якҷоя муваффақ ба он мешавем, ки пойтахти мамлакати азизамон  - шаҳри Душанбе боз ҳам пешрафта ва шинохтатар гардад. 

 

Оламбегими НЕКҚАДАМ, “Ҷумҳурият”