ҚАЛЛОБӢ

Боз як заминфурӯш дар толори суд

Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ирсоли парвандаи ҷиноятӣ нисбат ба Олимҷон Муҳаммадҷонзода ба суд, ки марбут ба замин аст, хабар дод.

Бино ба иттилои манбаъ, О. Муҳаммадҷонзода ба ҳайси мутахассис - заминсози ҶДММ «Кошиф-2017»  аз шаҳрванд «А» барои мусоидат намудан ҷиҳати ҷудо намудани қитъаи замини наздиҳавлигӣ аз ҳудуди Ҷамоати деҳоти Овчиқалъачаи ноҳияи Бобоҷон Ғафуров 7000 сомонӣ талаб намуда гирифтааст. Баъдан, ӯ барои гирифта додани сертификати ҳуқуқи истифодаи замин  боз аз шаҳрванд «А» 5000 сомонӣ гирифтааст.

Вобаста ба ҳолати мазкур, нисбат ба О. Муҳаммадҷонзода бо моддаи 247 қисми 2 бандҳои «в, г» Кодекси ҷиноятӣ (қаллобӣ бо истифода аз мақоми хизматӣ) парвандаи ҷиноятӣ оғоз гардида, ҳоло бо тасдиқи фикри айбдоркунӣ ба суд фиристода шудааст.  

 

 

ЗАБОНИ ДАВЛАТӢ

Ҷазои мансабдор барои риоя накардани талаботи қонун

Сардори раёсати ҳифзи муҳити зисти вилояти Хатлон барои риоя накардани талаботи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ҷазо дода шуд.

Тибқи иттилои маркази матбуоти Прокуратураи генералӣ, ҳолати иҷрои ин санади ҳуқуқӣ дар фаъолияти Раёсати ҳифзи муҳити зисти вилояти Хатлон аз ҷониби прокуратураи вилоят мавриди санҷиш қарор гирифта, дар натиҷа чанд мавриди қонуншиканӣ ошкор шудааст. Чунончи, Шодӣ Мӯсозода, сардори раёсат, то ҳол муҳр ва тамғаҳои бо забони ғайридавлатӣ навишташудаи ин ниҳодро истифода намудааст, ки хилофи моддаи 20 Қонун мебошад. Ҳамчунин, ӯ меъёри моддаи 18-ро риоя накарда, номи раёсати ҳифзи муҳити зистро бо забони ғайридавлатӣ нивишта, дар даромадгоҳи бинои коргоҳ насб намудааст.

Вобаста ба ин ҳолат, суди шаҳри Бохтар нисбат ба Ш. Мӯсозода ҷазо дар намуди ҷарима ба андозаи 30 нишондиҳанда барои ҳисобҳо баробар ба 1920 сомонӣ ба фоидаи давлат таъин кард. 

 

 

ТАНЗИМ

Қонуншикан ҷазо гирифт

Талабхоҷа Ҷобиров, сокини шаҳри Кӯлоб, барои вайрон кардани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ба ҷавобгарии маъмурӣ кашида шуд.

Аз Маркази матбуоти Прокуратураи генералӣ хабар доданд, ки ба ин шаҳрванд барои нақзи меъёри моддаи 14 банди 3 Қонун айб эълон гардид. Талабхоҷа Ҷобиров ҳангоми баргузор намудани маъракаи хонадоршавии фарзандаш вақти муайяншударо риоя накарда, 29 январи соли 2022 аз соати 11:30 бо оростани дастархон ва додани зиёфат тӯйи домодии фарзандашро оғоз намуда, сипас аз соати 18:00 то 20:00 бо иштироки сарояндагон базмро идома додааст.

 

Шуъбаи ҳуқуқи рӯзномаи «Ҷумҳурият»