Ҳукми абад ба фарзанди нохалафе, ки қасд ба ҷони модар кард

 

Суди Олии Ҷумҳурии Тоҷикистон шаҳрванд Мустақим Қосимовро дар куштори модараш муҷрим шинохта, то поёни умраш ба зиндон фиристод.

Дар ин бора маркази матбуоти Прокуратураи генералӣ хабар дод. Тибқи иттилои манбаъ, тафтиши парвандаи ҷиноятӣ бо моддаи 104 қисми 2 бандҳои «в, е» Кодекси ҷиноятӣ нисбат ба Мустақим Қосимовро прокуратураи шаҳри Роғун анҷом додааст. Дар рафти тафтишоти пешакӣ ва баррасии судӣ муайян шудааст, ки маҳкумшуда шаби 30 апрели соли 2021 ба ҳуҷраи хоби модараш Зебунисо Маҳмудова даромада, дар айни хоб ӯро бо зарби корд ба қатл расондааст.

Ин ҷинояти мудҳиш дар шаҳри Роғун содир гардид, бар пояи ҳукми суд, қотили модар ҳукми абади худро дар муассисаи ислоҳии дорои низоми махсус сипарӣ хоҳад кард.

 

 

ҚАЛЛОБӢ

Кормандони ҷамоат бо 13000 сомонӣ ришва ба даст афтоданд

Корманди Ҷамоати деҳоти Чоргултеппаи ноҳияи Рӯдакӣ Ҳақназар Садуллоев ҳангоми гирифтани 13000 сомонӣ аз шаҳрванд «А» дастгир шуда, ҳоло парвандаи ҷиноятӣ нисбат ба ӯ баъд аз анҷоми тафтишоти пешакӣ бо тасдиқи фикри айбдоркунӣ ба суд ирсол гардидааст.

Агентии назорати давлатии молиявӣ ва мубориза бо коррупсия хабар дод, ки Ҳ. Садуллоев, мутахассиси пешбар оид ба масъалаҳои андоз ва бойгонии Ҷамоати деҳоти Чоргултеппа, дар асоси маслиҳати пешакӣ бо муовини раиси ҳамин ҷамоат Зокиржон Гулмуродов ин миқдор маблағро барои омода карда додани шиносномаи техникии манзили истиқоматӣ ва шаҳодатнома дар бораи бақайдгирии давлатии қитъаи замин аз шаҳрванд «А» талаб намудаанд.

Вобаста ба ҳолати мазкур нисбат ба З. Гулмуродов ва Ҳ. Садуллоев  бо моддаи 247 қисми 4 банди «б» Кодекси ҷиноятӣ (қаллобие, ки ба миқдори махсусан калон содир шудааст) парвандаи ҷиноятӣ оғоз гардидааст. 

 

 

ДУЗДӢ

Боздошти як зан бо ин ҷурм

Кормандони мақомоти милитсия дар ноҳияи Бобоҷон Ғафуров як сокини ҳамин ноҳияро, ки маркази матбуоти Вазорати корҳои дохилӣ аз ӯ зани 41-сола ном мебарад, ба гумони содир кардани ҷинояти дуздӣ дастгир карданд.

Боздошти ин зан, дар пайи муроҷиати марди 69-солаи сокини ноҳия ба мақомоти милитсия муяссар шудааст. Ин мард дар аризааш ба ШВКД дар ноҳия арз намудааст, ки дар давоми моҳи октябри соли 2021 то моҳи феврали соли 2022 шахсони номаълум аз манзили истиқоматиаш молу ашёи рӯзгорро дуздидаанд. 

Зарари расондашуд 160 ҳазору 800 сомониро ташкил дода, айни ҳол нисбат ба ин ҳолат тафтишот оғоз шудааст.

 

Шуъбаи ҳуқуқи рӯзномаи «Ҷумҳурият»