Агар ба гузашта назар афканем, ҷаҳду талоши сокинони ин шаҳри бостонӣ барои ободии диёр дар саҳифаҳои зардшудаи он варақгардон мегардад. Рӯзнома дар солҳои аввали ташкилёбӣ бо номҳои “Колхозчӣ”, “Роҳи сотсиализм” ва “Роҳи коммунизм” фаъолият бурдааст. Маълум мешавад, ки ҳамон солҳо низ хизмати рӯзнома барои пешравии халқу диёр шоистаи ситоиш аст. Кормандони он дар ҳар саҳифа талошҳои хастанопазири халқро барои ояндасозӣ таҷассум менамуданд. Роҳи росту хирадро ҷуста, ба мардум иттилооти тоза, хабарҳои нав ва матлабҳои  фарҳангиву иҷтимоиро интиқол медоданд. 

Дар идораи “Паёми Истаравшан”, ки барои аҳолии шаҳр, бахусус барои қаламкашони ҷавону кордида, даргоҳи муқаддас ба шумор меравад, фаъ-олияти меҳнативу эҷодии аксари адибони маъруфи Истаравшан бо ин идора сахт алоқаманд аст. Ҳамин тавр, адибон Баҳриддин Азизӣ, Суҳайлӣ Ҷавҳаризода, Ноил Шерзода, Лутфӣ Обидхоҷаев, Сайфулло Қурбонӣ (Ваҳдӣ), Бақозода (Ахтарӣ), Ҳабибулло Фозилӣ, Бобоҷон Фозилов, Маҳкам Юлдошев дар рушду нумӯи матбуоти миллӣ низ саҳми сазовор гузоштанд. Навиштаҳои онҳо дар солҳои ҷангӣ ва давраи баъдиҷангӣ мардумро ба ҳимояи халқу Ватан, якдиливу инсонпарварӣ, ваҳдату осоиштагӣ, меҳнати зарбдор ва бунёдкориҳо  ҳидоят мекарданд.

Шахсиятҳои шинохта Раҳим Ҳайдаров, Абдуҳафиз Ғафуров, Ғанӣ Бобоҷонов, Норбой Рӯзиев, Неъмати Бобоҷон, Наимҷон Назирӣ, Бақо Шарофов, Субҳон Мухторов, Мирзомурод Ҳошимзода, Ҳикматуллои Насруллоҳ, Сайфулло Махкамов, Баҳром Юсуфзод, Нуриддин Ҷамол, Расул Носиров ва Қаюм Зиё дар рангин баромадани авроқи рӯзнома саҳми арзандаи хешро гузоштаанд. 

Дар замони соҳибистиқлолии кишвар низ рӯзномаи “Паёми Истаравшан” розу ниёзи худ ва мардумро дар саҳифаҳояш ҷой дода, мардум ба он ҳамчун боргоҳи умед муроҷиат мекунад. Рӯзномаи ҳамқадаму ҳамнафаси мардум аст.

Ҳоло як гурӯҳ эҷодкорони хушсалиқа, ба монанди Султонмурод Ҳоҷибоев, Илҳом Юлдошев, Раъно Мирғиёсова, Ӯктами Нурулло, Гулбаҳор Султонова ва чанде дигарон дар рӯзнома машғули эҷоданд.

Бовар дорем, ки аҳли эҷоди  “Паёми Истаравшан” ва оянда насли ҷавоне, ки ба ин даргоҳ рӯи ниёз меорад, рисолати рӯзнома ва хизмат ба низоми тафаккури ҷомеаро дуруст дарк мекунанд. Ҷаридаи 90 - солаи шаҳри бостониро, ки ба масал пири хирадро мемонад, ҳифз, парасторӣ ва тарғибу ташвиқ мекунанд. 

 

Саъдулло САЙФУЛЛОЗОДА, рӯзноманигор