ПОРА

Корманди андоз бо 10 000 сомонӣ ба даст афтод

Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки парвандаи ҷиноятӣ нисбат ба Ҷамшед Ғаффоров баъд аз анҷоми тафтишоти пешакӣ бо тасдиқи фикри айбдоркунӣ ба суд ирсол гардид.

Тибқи иттилои манбаъ, Ҷамшед Ғаффоров, мутахассиси пешбари гурӯҳи хизматрасонӣ ба шахсони ҳуқуқии шуъбаи хизматрасонӣ ба андозсупорандагони Нозироти андоз дар шаҳри Ваҳдат, ҳангоми гирифтани 5000 сомонӣ ҳамчун пора аз ҷониби маъмурони агентӣ дар дафтари кориаш дастгир шуд. Ин дар ҳолест, ки ӯ барои қатъ намудани фаъолияти соҳибкорӣ аз шаҳрванд «А» 10 000 сомонӣ талаб карда, 5 ҳазорашро пешакӣ гирифтааст.

Вобаста ба ин ҳолат, нисбат ба Ҷамшед Ғаффоров бо моддаи 319 қасми 1 Кодекси ҷиноятӣ (гирифтани пора аз ҷониби шахси мансабдор) парвандаи ҷиноятӣ оғоз гардидааст, ки ин банди қонун маҳрум сохтан аз озодӣ ба муҳлати то панҷ солро пешбинӣ менамояд.

 

 

ҶИНОЯТ БЕ ҶАЗО НАМЕМОНАД

Чорводуздон баъд аз ду сол боздошт шуданд

Кормандони мақомоти милитсия ду сокини шаҳри Кӯлобро, ки аз онҳо марди 39-сола ва ҷавони 24-сола ном бурда мешавад, ба гумони содир намудани ҷинояти дуздӣ боздошт намуданд. 

Тавре маркази матбуоти Вазорати корҳои дохилӣ хабар дод, дастгиршудагон ҳанӯз моҳи августи соли 2020 аз заминҳои чарогоҳи ноҳияи Муъминобод се сар чорвои калони шохдорро дуздидаанд. Зарари расондашуда 14 ҳазор сомониро ташкил дода, айни ҳол аз рӯи ин ҳодиса тафтишот идома дорад. 

 

 

ДУЗДӢ

Ноболиғи 13 - сола даст ба ин ҷиноят зад

Бар пояи маълумоти сомонаи ВКД, ноболиғе дар шаҳри Душанбе ба гумони дуздии ҷавоҳироти тиллоӣ ба маблағи 65 ҳазор сомонӣ дастгир шуд, ки ҳамагӣ 13 сол дорад.

Боздоштшуда сокини шаҳри Душанбе буда, 27 апрели соли 2022 бо роҳи пинҳонӣ ба манзили истиқоматии зани 33-солаи сокини пойтахт даромада, ҷавоҳироти тиллоиро дуздидааст. Гумонбарро кормандони ШВКД-1 дар ноҳияи Сино дар асоси муроҷиати ҷабрдида дастгир карданд, ки ҳоло вобаста ба ин ҳодиса тафтишот оғоз шудааст.  

 

Шуъбаи ҳуқуқи рӯзномаи «Ҷумҳурият»