- Пеш аз Истиқлоли давлатии Ҷумҳурии Тоҷикистон Ҷамоати деҳоти Язгулом аз ҷиҳати иқтисодӣ ва иҷтимоӣ яке аз мавзеъҳои қафомондаи ноҳияи Ванҷ дар Вилояти Мухтори Кӯҳистони Бадахшон ба шумор мерафт, - гуфт дар суҳбат  котиби Ҷамоати деҳот Зуҳро Шошоева.- Ҳамаи  роҳу пулҳо дар ҳолати  вайронӣ ва садамавӣ қарор доштанд. Мардум борҳоро харакӣ ва пуштора ба деҳаҳои дурдаст ва баландкӯҳи Андарбак, Жамаг ва Зайч мекашонданд.  Сокинони  8 деҳаи  Ҷамоати деҳот  аз норасоии қувваи барқ танқисӣ доштанд. Киштзорон ва боғҳои деҳаҳои Вишхарву  Андарбак ва Дашти Язгулом аз беобӣ хушк мегардиданд.  Биноҳои муассисаҳои таҳсилоти миёнаи умумӣ, асосӣ ва ибтидоии деҳаҳои Мотравн, Шавуд, Будун,  Вишхарв, Андарбак ва Жамаг, ки  ҳанӯз солҳои панҷоҳум ва шастуми асри  XX сохта шуда буданд, дар ҳолати садамавӣ қарор  доштанд.

Баъди сафарҳои кории Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалҳои ободонӣ, бунёдкорӣ ва созандагӣ оғоз гардида, мушкилоти мардум аз миён бардошта шуданд. Дар аввали солҳои соҳибистиқлолӣ бо иштироки Роҳбари давлат Неругоҳи барқи обии «Андарбак» бо тавоноии 450 киловатт - соат сохта, мавриди истифода қарор гирифт, хати баландшиддати барқии 35- киловолтаи Вомар -  Шидз- Деҳ- Шпад- Язгулом аз ҷониби ширкати «Помир энерҷӣ» кашида шуд. Ҳоло сокинони Ҷамоати деҳоти Язгулом 24 соат аз неруи барқ истифода мебаранд.

Файзу баракати даврони истиқлол ба он мусоидат намуд, ки роҳи мошингард то охирин деҳаи водӣ – деҳаи  Зайч аз ҷониби коргарони Муассисаи давлатии нигаҳдории роҳҳои автомобилгарди  ноҳияи Ванҷ бо дастгирии Вазорати нақлиёт ва ёрии Мақомоти иҷроияи ҳокимияти давлатии  Вилояти Мухтори Кӯҳистони Бадахшон бунёд гардид. Дар нахустин солҳои соҳибистиқлолӣ пули мошингузар дар мавзеи Шавуд - Будун аз болои дарёи Язгуломоб сохта шуд. Ҳамчунин, бо дастгириҳои Ҳукумати Ҷумҳурии Тоҷикистон ва шарикони рушд аҳолии ҳамаи деҳаҳо бо оби ошомиданӣ ва киштзорону боғоти деҳаҳои Мотравн, Дашти Язгулом, Андарбак ва Вишхарв бо оби полизӣ таъмин шуда, биноҳои муассисаҳои таълимии ҳудуди ҷамоат навсозӣ ва таъмиру таҷдид гардиданд. Бинои дуошёнаи маъмурии ҷамоати деҳот, беморхонаи минтақавӣ, ду маркази саломатӣ ва се бунгоҳи тиббӣ мавриди истифода қарор гирифтанд.

Аҳолии деҳоти водии Язгулом аз он шоданд, ки дар доираи сазовор истиқбол гирифтани Ҷашни 35- солагии Истиқлоли давлатии Ҷумҳурии Тоҷикистон чор пули мошингузар дар мавзеъҳои Андарбак, Вишхарв ва Жамаг бунёд меёбад ва мошинҳо то охирин деҳаҳои  кӯҳистон борҳои заруриро дар чор фасли сол  мекашонанд. 

 

Муҳаммадзоиршо ШАРИФЗОДА, «Ҷумҳурият»,

Сироншоҳи ДИЛОВАР, рӯзноманигор