Профессор Ғаффор Ҷӯраев аз зумраи донишмандоне мебошад, ки  дар рушди илми забоншиносии тоҷик нақши муниру мондагор гузоштааст. Ӯ бо силсилаи таҳқиқоташ дар омӯзиши забон садҳо гиреҳи нокушударо  боз намудаву дар ин бобат асарҳои зиёди арзишманд офаридааст, ки  ба онҳо шарқшиносони машҳур баҳои баланд додаанд. Ин нукта зимни баргузории мизи мудаввар, ки ба хотири гиромидошти  донишманд Ғаффор Ҷӯраев дар Китобхонаи миллӣ доир шуд, зикр гардид.

Одилҷон Алиев, номзади илмҳои филология, дотсенти кафедраи назария ва амалияи забоншиносии Донишгоҳи давлатии омӯзгории Тоҷикистон ба номи Садриддин Айнӣ, зимни суханронӣ Ғаффор Ҷӯраевро аз машҳуртарин забоншиносони ҷумҳурӣ муаррифӣ карда гуфт, ки ӯ умри худро сарфи таҳқиқу баррасии ин соҳаи илм намуда, вобаста ба масъалаҳои гуногуни забоншиносӣ беш аз 250 китобу рисолаҳо, монография ва мақолаҳои илмӣ, дастурҳои методӣ  таълиф кардааст.

Фаъолияти омӯзгории Ғаффор Ҷӯраев низ назаррас арзёбӣ шуд. Зикр гардид, ки ӯ дар баробари таҳқиқу омӯзиши забони тоҷикӣ 60 соли умри хешро сарфи таълим ба донишҷӯёни Донишгоҳи давлатии омӯзгории Тоҷикистон ба номи Садриддин Айнӣ ва Донишгоҳи техникии Тоҷикистон ба номи академик Муҳаммад Осимӣ намудааст.

Сахидод Раҳматулло, профессор, гуфт, ки устод Ғаффор Ҷӯраев дар матншиносӣ, нақди адабӣ, тарҷума низ  нақши назаррас дорад.

Устод соли 1961, баъди  хатми Институти педагогии шаҳри Душанбе ба номи Т. Г. Шевченко (ДДОТ) ба  Институти забон ва адабиёти  ба номи Абуабдуллоҳ Рӯдакӣ омада, дар таълим, тадрис ва тарбияи кадрҳои ҷавон, фаъолият доштанд. Бо қарори Ҳукумати Ҷумҳурии Тоҷикистон  ба вазифаи роҳбари Комиссияи татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» дар назди Ҳукумати Ҷумҳурии Тоҷикистон таъин шуда, 14 сол дар ин вазифа фаъолият намуду дар амалишавии Қонун нақши зиёд гузошта, бобати ҷараёни татбиқи он зери унвони «10 соли қонуни забон» китобе ба нашр расонд.

 «Луғати шеваҳои забони тоҷикӣ», «Луғати калима ва истилоҳоти нав», «Лаҳҷашиносӣ», «Масъалаи рушди забон аз нигоҳи Президент», «Забон ва истиқлол», аз ҷумлаи китобҳои дигари Ғаффор Ҷӯраев мебошанд.

Фарзона ФАЙЗАЛӢ, «Ҷумҳурият»