ҚАЛЛОБӢ ВОБАСТА БА ЗАМИН

Раис ҳангоми гирифтани пора дастгир шуд

 

Раиси Ҷамоати шаҳраки Шайдони ноҳияи Ашт Аловиддин Ҳабибуллоев, ки ҳоло парвандаи ҷиноятӣ нисбат ба ӯ бо тасдиқи фикри айбдоркунӣ ба суд ирсол шуд, ҳангоми гирифтани пора аз ҷониби маъмурони Агентии назорати давлатии молиявӣ ва мубориза бо коррупсия дастгир гардидааст.

Тавре маркази матбуоти агентӣ хабар дод, ӯ бо истифода аз ваколати мансабӣ барои ҷудо намудани қитъаи замини наздиҳавлигӣ ба масоҳати 0,8 гектар аз шаҳрванд «А» 10 000 сомонӣ талаб намудааст. Номбурда аз ин маблағ 5000 сомониашро қаблан гирифта, ҳангоми гирифтани боз 4000-и дигар ба даст афтод.

Дар робита ба ин ҳолат нисбат ба А. Ҳабибуллоев бо моддаи 247 қисми 2 бандҳои «в,г» Кодекси ҷиноятӣ (қаллобӣ бо истифода аз мақоми хизматӣ) парвандаи ҷиноятӣ оғоз гардид. 

 

 

 

ТАНЗИМ

Қонуншикан ҷазо гирифт

Сокини шаҳри Ваҳдат Иззатулло Холов барои вайрон кардани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ба ҷавобгарии маъмурӣ кашида шуд.

Тибқи иттилои маркази матбуоти Прокуратураи генералӣ, шаҳрванд Иззатулло Холов ба он айбдор мешавад, ки меъёри моддаи 11 банди 2 Қонунро риоя накардааст. Аз ҷумла, дар рафти санҷиш аз ҷониби прокуратураи шаҳри Ваҳдат муайян шудааст, ки номбурда бе гирифтани тавсиянома аз комиссияи доимии танзими анъана ва ҷашну маросим моҳи марти соли ҷорӣ маросими соли додарашро дар рӯзи корӣ (аз соати 9:00) бо додани таом баргузор намудааст.

Вобаста ба ин амал, суди шаҳри Ваҳдат нисбат ба Иззатулло Холов бо дастрасии қисми 5 моддаи 48 Кодекси ҳуқуқвайронкунии маъмурӣ ҷазо дар намуди ҷарима таъин намуд.

 

 

 

ДУЗДӢ

Боздошти марде, ки даст ба ин ҷиноят зад

 

Кормандони мақомоти милитсия дар шаҳри Кӯшониён марди 26-солаеро дастгир намуданд, ки ба содир намудани ҷинояти дуздӣ гумонбар мешавад. 

Маркази матбуоти Вазорати корҳои дохилӣ дар ин бора хабар дод, ки гумонбар 12 майи соли ҷорӣ пинҳонӣ ба нуқтаи таъмири нақлиётӣ,  воқеъ дар маҳаллаи Ҳаёти Нави ноҳия ворид шуда, аз он ҷо 60 балон, 15 диск ва 1 адад камераи мушоҳидавиро дуздидааст. 

Зарар 21 ҳазору 800 сомониро ташкил дода, оид ба ин ҳолат тафтишот идома дорад.

 

Шуъбаи ҳуқуқи рӯзномаи «Ҷумҳурият»