Рушди соҳаи маориф ва баланд бардоштани сатҳу сифати таълим, ки ба пешрафти ҷомеа иртиботи мустақим дорад, яке аз масъалаҳои меҳвариест, ки ҳамеша зери таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Сарвари давлат дар идомаи ташаббусҳои беназирашон вобаста ба рушди соҳа ва камолоти насли бомаърифат дар Паёми худ ба Маҷлиси Олӣ, аз 26 декабри соли 2019 ба хотири  боз ҳам  беҳтар ба роҳ мондани омӯзиши илмҳои табиатшиносӣ, дақиқ ва риёзӣ, инчунин, тавсеаи тафаккури техникии насли наврас солҳои 2020 – 2040 - ро “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карданд.

Ин иқдоми дурбинона аз ҷониби тамоми табақаҳои ҷомеа, бухусус доираҳои маърифатию аҳли маорифи кишвар истиқболи гарм пайдо намуд. Ҳар як кашфиёту навоварӣ рушди ҷомеаро такон бахшида, роҳ ба сӯи музаффариятҳоро мунаввар месозад. Ҳоло дар мамлакати мо бо мақсади татбиқи ҳадафҳои “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” барномаи махсуси давлатӣ  таҳияву тасдиқ гардидааст, ки  вобаста ба  амалисозии он  муассисаҳои таълимӣ нақшаи фаъолияти худро тартиб дода, барои иҷрояш камари ҳиммат бастаанд.

Пешвои муаззами миллат дар Паёми навбатиашон ба Маҷлиси Олӣ  (21 декабри 2021) таъкид намуданд, ки дар даврони соҳибистиқлолии кишварамон ҳадафи муҳимтарин ва самти афзалиятноки сиёсати иҷтимоии давлат ва Ҳукумати мамлакат бунёди маорифи миллӣ ва  ворид гардидан ба фазои таҳсилоти байналмилалӣ мебошад. Зимни ироаи Паём, ҳамзамон, зарурати боз ҳам баланд бардоштани сатҳу сифати таҳсилот, омода кардани кадрҳои баландихтисос, омӯхтани забони давлатӣ, таъриху фарҳанги бостонии халқи тоҷик, боло бурдани завқу рағбати хонандагон ба омӯзиши фанҳои риёзӣ, дақиқ, табиӣ, технологияи иттилоотӣ ва аз худ кардани забонҳои хориҷӣ, махсусан забонҳои русиву англисӣ, таваҷҷуҳи аввалиндараҷа зоҳир гардид.

Ташаббусу иқдомҳои Президенти маҳбубамон дар созмону сарпарастӣ намудани Озмуни ҷумҳуриявии «Фурӯғи субҳи доноӣ китоб аст», нашри силсилакитоби «Ахтарони адаб» иборат аз панҷоҳ ҷилд, ба ҳар як оилаи кишвар ба таври ройгон дастрас гардидани шоҳасари «Тоҷикон»-и Бобоҷон Ғафуров, таҷлили Рӯзи китоб, бунёди мактабу   кӯдакистонҳо, китобхонаҳо аз ҷумлаи ибтикороти маърифатпарваронае ба шумор мераванд, ки дар маҷмуъ, ба таҳкими неруи зеҳниву ақлонии аҳли ҷомеа мусоидат хоҳанд кард. Ба таъкиди Сарвари давлат, ҳадаф аз баргузории озмунҳои «Илм – фурӯғи маърифат», «Тоҷикистон – Ватани азизи ман», «Фурӯғи субҳи доноӣ китоб аст» ва олимпиадаву озмунҳои гуногун тақвият бахшидани ҳувияти миллӣ, ҳисси ифтихор аз таъриху тамаддуни бостонии халқамон, боз ҳам баланд бардоштани сатҳи саводнокиву маърифатнокии мардум, қабл аз ҳама, наврасону ҷавонон, тақвияти завқи зебоипарастии онҳо ва пайдо кардани истеъдодҳои нодир аз байни наслҳои ояндасоз мебошад.

Бешубҳа, дар доираи амалӣ намудани Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф мо метавонем, рушди иқтисоди миллӣ ва татбиқи ҳадафи чоруми стратегӣ – саноатикунонии босуръати кишварро таъмин созем. Дар самти ҷустуҷӯ ва иктишофи канданиҳои фоиданок ба дастовардҳои наву саодатбахш мушарраф шавем. Аз ин рӯ, дар баробари сохторҳои салоҳиятдор тамоми ниҳодҳои дигар ва аҳли ҷомеаро зарур аст, ки барои расидан ба ҳадафҳои рушди миллӣ дастуру нишондодҳои Сарвари давлатро сармашқи кори худ қарор дода, дар татбиқи сиёсати оқилонаи давлату Ҳукумати ҷумҳурӣ саҳм гузорем. 

 

Бозоралӣ ОДИНАЗОДА, 

раиси ноҳияи Мир Сайид Алии Ҳамадонӣ