ҳуқуқ
ҶИНОЯТ ВА ҶАЗО
НАФС
Суистифода аз ваколат ҳаёти директорро доғдор кард
Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки парвандаи ҷиноятӣ нисбат ба Маҳмадӣ Мирзоев, директори Ҷамъияти дорои масъулияти маҳдуди «Меҳроб – 2016», ба суд ирсол гардид.
Тавре гуфта мешавад, номбурда ҳамчун роҳбари мактаби ронандатайёркунӣ бо истифода аз ваколати идоравӣ ба боварии шаҳрвандон даромада, барои тайёр карда додани гувоҳномаи хатми курси таълимии ронандагӣ дараҷаи “В” аз онҳо дар ду ҳолат 10 000 сомонӣ гирифтааст.
Вобаста ба ин ҳолат, нисбат ба М. Мирзоев бо моддаи 295 қисми 1 Кодекси ҷиноятӣ (суистифодаи ваколат аз ҷониби кормандони ташкилотҳои тиҷоратӣ ва дигар ташкилотҳо) парвандаи ҷиноятӣ оғоз гардид, ки ин банди қонун ҷазо дар намуди ҷарима, корҳои ислоҳӣ ё маҳрум сохтан аз озодӣ ба муҳлати то 2 солро пешбинӣ менамояд.
ДУЗДӢ
Боздошти гумонбар баъди зиёда аз як сол
Кормандони мақомоти милитсия дар ноҳияи Муъминобод марди 26-солаеро дастгир намуданд, ки дар дуздии 11 ҳазор сомонӣ гумонбар мешавад.
Тибқи иттилои маркази матбуоти Вазорати корҳои дохилӣ, боздоштшуда ҳанӯз моҳи августи соли 2021 бо роҳи пинҳонӣ ба манзили истиқоматии марди 42-солаи сокини ҳамин ноҳия даромада, ин миқдор маблағро аз дохили ҷузвдон дуздидааст.
Ҳоло аз рӯи ин ҳодиса, ки зиёда аз як сол қабл сурат гирифта, мунтаҳо ошкор шуд, тафтишот идома дорад.
ҚАЛЛОБӢ
Оғози тафтиши амалҳои як мардумфиреб
Як сокини ноҳияи Варзоб, ки аз ӯ марди 39-сола ном бурда мешавад, дар ду ҳолат даст ба мардумфиребӣ зада, ҳоло бо гумони содир намудани ҷинояти қаллобӣ дастгир шудааст.
Сомонаи ВКД хабар дод, ки шахси гумонбар моҳи январи соли 2022 бо роҳи фиреб ба бовари як сокини ноҳияи Данғара даромада, аз ӯ 100 ҳазор сомонӣ гирифта то ҳол маблағашро барнагардондааст. Ҳамчунин, бо ҳамин роҳ аз як сокини ноҳияи Рӯдакӣ низ 100 ҳазор сомонӣ гирифтааст, ки вобаста ба ин тафтишот оғоз гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 25.05.2022 №: 99-100 Мутолиа карданд: 2315