Таҳти чунин ном дар Академияи идоракунии давлатии назди Президенти Ҷумҳурии Тоҷикистон барои раисони вилоятҳо, шаҳру ноҳияҳо, инчунин,  масъулони самти маҳал курси такмили ихтисос гузаронда шуд.

Тавре аз Академияи идоракунии давлатӣ хабар доданд, курси такмили ихтисос аз 25 май то 27 майи соли равон баргузор гардид.

Зимни ҷамъбасти курс Абдухалил Ғафурзода, ректори Академияи идоракунии давлатӣ,  Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилноза Аҳмадзода муовини директори Агентии хизмати давлатӣ, Нуралӣ Риозода, муовини раиси Кумитаи рушди маҳал, Сахидод Раҳматуллозода, муовини раиси Кумитаи забон ва истилоҳот, Камолиддин Бозиев, муовини сардори раёсати рушди минтақаҳои Вазорати рушди иқтисод ва савдо иштирок ва суханронӣ намуданд.

Ҳамчунин, қабл аз ҷамъбасти курс дар мавзуи “Идоракунии давлатӣ дар замони муосир: ҳолат ва дурнамо” мизи мудаввар доир гардида, дар ҷараёни он иштирокчиён фикру ақидаҳояшонро иброз доштанд.

Тибқи барномаи таълимӣ барои иштирокчиёни курс машғулиятҳо вобаста ба хизматрасонии электронӣ дар иқтисоди рақамӣ, Кодекси одоби хизматчии давлатӣ, пешгирии стресс дар раванди идоракунӣ, мактаби давлатдории Эмомалӣ Раҳмон, мушкилот ва пешниҳодҳо вобаста ба таҳия ва рафти иҷроиши барномаҳои рушди иҷтимоиву иқтисодии шаҳру ноҳияҳо, техникаи таҳияи санадҳои меъёрии ҳуқуқӣ дар Ҷумҳурии Тоҷикистон: масъалаҳои назариявӣ ва амалӣ, Қонуни Ҷумҳурии Тоҷикистон “Дар бораи муроҷиатҳои шахсони воқеӣ ва ҳуқуқӣ”, сиёсати давлатӣ оид ба саноатикунонии босуръат, сарварӣ ва хусусиятҳои он дар замони муосир ва нақши хизматчии давлатӣ дар пешгирии гаравиши ҷавонон ба ҳизбу ҳаракатҳои экстремистӣ омӯзонда шуданд.

Бояд гуфт, ки курси такмили ихтисос дар асоси дастуру ҳидоятҳои Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон зимни ифтитоҳи бинои Академия роҳандозӣ гардида, дар он коршиносон ва мутахассисони варзида оид ба нозукиҳои идоракунии давлат ба шунавандагон маълумот хоҳанд дод.

 

З. РАҶАБ,  “Ҷумҳурият»