Бо фаро расидани фасли тобистон ҳарорати ҳаво дар баъзе минтақаҳои кишвар то 40 дараҷа ва бештар аз он мерасад. Табиист, ки бо оғози мавсими гармо аҳолӣ, махсусан ҷавонону наврасон, ба оббозӣ майл намуда, талабот ба ҷойҳои махсуси оббозӣ зиёд мешавад. Таҷриба нишон медиҳад, ки дар ин мавсим баъзан сокинони мамлакат дар каналу дарёҳо оббозӣ мераванд, ки, мутаассифона, боиси оқибатҳои нохуши ғарқшавӣ мегардад. 

Бале на ҳама каналу дарёву рӯдҳо барои шиноварӣ муносиб мебошанд. Донистани қоидаҳои оббозӣ ва дуруст риоя намудани онҳо дар ҷойҳои махсусгардондашуда метавонад аз оқибатҳои ногувор ҷилавгирӣ  намояд. Аз ин рӯ, бахши раёсати Кумитаи ҳолатҳои фавқулода ва мудофиаи граждании шаҳри Душанбе дар ноҳияи Фирдавсӣ, аз оғоз шудани тобистон ва оқибатҳои нохуши оббозии сокинон дар ҷойҳои номуносиб изҳори  нигаронӣ  мекунад. Бинобар ин, ҷиҳати пешгирӣ аз ҳар гуна ҳодисаҳои нохуш бахши раёсати кумита пайваста бо сокинон корҳои фаҳмондадиҳиро баргузор намуда, ҷомеаи шаҳрвандиро ҳушдор медиҳад, ки дар дарёи пуртуғёни Душанбе ва каналҳо машғул шудан ба шиноварӣ қатъиян манъ аст. Зимнан, аз волидони кӯдакону наврасон эҳтиромона хоҳиш мешавад, ки фарзандони худро дар ин мавзеъҳои  мамнуъ барои оббозӣ бе назорат нагузоранд. Инчунин, аз тамоми шаҳрвандон ва меҳмонон даъват карда мешавад, ки дар ҷойҳои номумкин, аз оббозӣ худдорӣ намоянд.

Бахши раёсати кумита дар ноҳияи Фирдавсӣ барои пешгирӣ аз ҳодисаҳои нохуш  ба шаҳрвандон тавсия медиҳад: танҳо дар ҷойҳое шиноварӣ кунанд, ки барои оббозӣ намудан иҷозат дода шудааст: яъне ҷойҳои махсусгардондашуда ва ҳавзҳо барои оббозӣ; дар минтақаи тезҷараён набояд ба шиноварӣ машғул шуд; яъне дар дарё ва каналҳо; кӯдакон ва наврасон бояд танҳо зери назорати волидон ва афроди калонсол ба оббозӣ машғул шаванд; дар ҳоли сархушӣ аз машрубот ва маводи масткунанда ба об даромадан қатъиян манъ аст; дар нуқтаҳои номуайян ба об даромадан манъ аст, зеро метавон ба санг ва дигар чизҳо дар зери об бархӯрду аз ҳуш рафт ё ҷон бохт; ҳангоми шино аз бозиҳои хатарнок худорӣ кунанд; ба аломатҳои огоҳкунанда таваҷҷуҳ кунанд ва ҷиддан тибқи онҳо амал кардан мувофиқи мақсад мебошад; танҳо дар ҷойҳои  барои  оббозӣ  муқарраршуда шиноварӣ кардан мумкин аст.