Ҷумҳурии Тоҷикистон ҳамчун кишвар демократӣ, ҳуқуқбунёд ва иҷтимоӣ таъмини манфиатҳои кӯдакону наврасон, некуаҳволӣ ва инкишофи ҳамаҷонибаи онҳоро яке аз афзалиятҳои муҳими сиёсати давлатӣ арзёбӣ намудааст. Ҳифзи ҳуқуқи кӯдакон аз ҷониби давлат дар сатҳи Конститутсияи Ҷумҳурии Тоҷикистон кафолат дода мешавад. Гузашта аз ин, мамлакати мо новобаста аз вазъи мураккаби солҳои аввали соҳибистиқлолӣ аз ҷумлаи аввалин мамлакатҳои пасошӯравӣ буд, ки соли 1993 аъзои Конвенсияи СММ оид ба ҳуқуқҳои кӯдак гардид. 

Ба андешаи Суҳайлӣ Қодирӣ, сардори шуъбаи ҳифзи давлатии ҳуқуқҳои кӯдаки дастгоҳи марказии мақомоти Ваколатдор оид ба ҳуқуқи инсон дар Ҷумҳурии Тоҷикистон, таъмини ҳифзу ҳуқуқҳои кӯдакон дар меҳвари сиёсати иҷтимоии Ҳукумати мамлакат қарор дорад. Тибқи Конститутсия, давлат оиларо ҳамчун асоси ҷамъият ҳимоя намуда, модару кӯдакро таҳти ҳимоя ва ғамхории махсус қарор медиҳад. Аз ин рӯ, мақомоти Ваколатдор оид ба ҳуқуқи инсон масъалаҳои ҳифзи ҳуқуқи кӯдакон ва мушкилоти дар ин самт мавҷударо пайваста бо масъулони шуъбаҳои маориф, тандурустӣ, ҳифзи иҷтимоии аҳолӣ, мақомоти ҳифзи ҳуқуқ, комиссияҳои маҳаллӣ оид ба ҳифзи ҳуқуқи кӯдак, раисони ҷамоатҳои шаҳраку деҳот ва сохторҳои ҷомеаи шаҳрвандӣ мавриди баррасӣ қарор медиҳад. Кӯдакон дар Ҷумҳурии Тоҷикистон аз як қатор имкониятҳо ва кумакҳои иҷтимоӣ бархӯрдоранд, аз лаҳзаи таваллуд давлат ба модари тифл ҳуқуқи махсус, аз қабили рухсатӣ барои тарбияи кӯдак ва ба воя расондани он медиҳад. Имтиёзи дигар барои кӯдакон ин кафолат додани давлат ба таҳсилоти умумӣ ва ибтидоии касбии ройгон дар мактабу омӯзишгоҳҳо буда, ҷанбаи муҳими он таъмини таҳсилоти ройгони мактабҳои миёна ва олии касбӣ мебошад.

Як нуктаи муҳимро бояд зикр кард, ки давлат нисбат ба ҳаёти кӯдакони ятим, маъюб ва бепарастор бетафовут набуда, ғамхорӣ ва дастгирии онҳоро аз вазифаҳои аввалиндараҷаи худ мешуморад. Чунончи, Президенти Ҷумҳурии Тоҷикистон, Пешаои миллат муҳтарам Эмомалӣ Раҳмон дар Паёмашон ба Маҷлиси Олӣ (26.01.2021) дастур доданд, ки нафақаи кӯдакони маъюби то 18 - сола, ки дар асоси Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ» таъин шудааст, ба андозаи 20 фоиз, инчунин, нафақаи маъюбони гурӯҳи якум, ки дар асоси Қонуни болозикр таъин гардидааст, ба андозаи 50 фоиз баланд бардошта шавад.

Ин далели он аст, ки роҳбарияти олии мамлакат барои дастгирии иҷтимоӣ, тавонбахшӣ ва солимгардонӣ, таҳсилоти кӯдакони маъюбиятдошта ва барои онҳо муҳайё намудани муҳити дастрас барномаҳои дахлдорро амалӣ менамояд. 

Бояд гуфт, ки ҳамасола 1 июн - Рӯзи байналмилалии ҳифзи кӯдакон дар ҳамаи шаҳру ноҳияҳои мамлакат бо шукӯҳу шаҳомати хос таҷлил мегардад. Чунончи, тибқи қарори раиси шаҳри Душанбе Рустами Эмомалӣ барои кӯдакони пойтахт барномаи фарҳангиву фароғатӣ баргузор гардида, намоиши ҳунару эҷод, мусаввараҳои беҳтарин, дастовардҳои кӯдакону наврасони шаҳр ва озмуни расмкашӣ ташкил шуд. 

Гузашта аз ин, бо дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар арафаи Рӯзи байналмилалии ҳифзи кӯдакон раисони вилоятҳо ва шаҳру ноҳияҳои кишвар ба ҳолпурсӣ ва табрики кӯдакони маъюб, бесарпаноҳ ва камбизоат рафта, ба онҳо туҳфаҳо тақдим менамоянд.  

Воқеан, насли хурдсолу навраси имрӯзи кишвар насли хушбахтанд, зеро пайваста таҳти ҳимоя ва парастории Ҳукумати кишвар қарор доранд ва тамоми имтиёзу шароитҳо барояшон фароҳам оварда шудаанд. Ягона вазифаи волидон, мактаб ва ҷомеа ин ҳимояи ҳуқуқ ва ҳифзи кӯдакон аз ҳар гуна зарари ҷисмониву равонӣ мебошад. Ояндаи кишвар аз дуруст тарбия гирифтани насли ҷавон вобастагии зиёд дорад. Аз ин рӯ, дар партави сиёсати ояндасози Ҳукумати ҷумҳурӣ ҳар яки мо бояд дар ҳифзу нигаҳдорӣ ва риояи ҳуқуқи кӯдакон саҳмгузор бошем.

 

Оламбегими НЕКҚАДАМ,

«Ҷумҳурият»