ҳуқуқ
ҶИНОЯТ ВА ҶАЗО
КОРРУПСИЯ
Қаллобӣ корманди комиссариати ҳарбиро ба толори суд бурд
Сардори зершуъбаи молия ва хоҷагидории комиссариати ҳарбии ноҳияи Шаҳринав Сайёдҷон Нарзуллоев барои кӯшиши тайёр карда додани шаҳодатномаи хизмати ҳарбии корношоям ба курсии айбдорӣ нишаст.
Маркази матбуоти Агентии назорати давлатии молиявӣ ва мубориза бо коррупсия дар ин бора иттилоъ дод, ки номбурда барои тайёр карда додани шаҳодатномаи хизмати ҳарбии корношоям аз шаҳрванд “А” 10000 сомонӣ талаб намудааст. Аз ин миқдор 5000 сомониро қаблан гирифта, ҳангоми гирифтани боз 2000 сомонии дигар дар ҷойи ҳодиса дастгир шуд.
Дар ин робита, нисбат ба Сайёдҷон Нарзуллоев бо моддаи 247, қисми 2 банди “в” Кодекси ҷиноятӣ (қаллобӣ бо расондани зарари ҷиддӣ ба шаҳрванд) парвандаи ҷиноятӣ оғоз гардида, ҳоло бо тасдиқи фикри айбдоркунӣ ба суд фиристода шудааст.
МУОМИЛОТИ ҒАЙРИҚОНУНӢ
Нусратулло бо доллар савдо карду 25600 сомонӣ ҷарима шуд
Суди ноҳияи Ёвон соҳибкор Нусратулло Карликовро барои муомилоти ғайриқонунӣ бо асъори хориҷӣ 25600 сомонӣ ҷарима кард.
Тавре маркази матбуоти Прокуратураи генералӣ хабар дод, номбурда ҳамчун фурӯшанда дар мағозаи фурӯши масолеҳи сохтмонӣ, воқеъ дар бозори Панҷшанбеи ноҳияи Ёвон фаъолият намуда, 3 марти соли ҷорӣ ба харидори шартӣ Баҳовиддин Вайсиддинов як миқдор масолеҳи сохтмониро ба маблағи 3000 доллари амрикоӣ фурӯхтааст, ки хилофи талаботи моддаи 286, қисми 2 Кодекси ҷиноятии Ҷумҳурии Тоҷикистон мебошад.
Вобаста ба ин ҳолат, прокуратураи ноҳияи Ёвон нисбат ба Н. Карликов парвандаи ҷиноятӣ оғоз намуда, баъд аз анҷоми тафтишоти пешакӣ ба суд ирсол намуд.
ДУЗДӢ
Бо ин ҷурм нисбат ба ноболиғе парвандаи ҷиноятӣ оғоз шуд
Дар ноҳияи Ҷаббор Расулови вилояти Суғд алайҳи ноболиғи 17 - сола парвандаи ҷиноятӣ оғоз шудааст.
Бино ба иттилои сомонаи Вазорати корҳои дохилӣ, ноболиғ сокини ҳамин ноҳия буда, шаби 16 майи соли ҷорӣ бо роҳи пинҳонӣ ба мағозаи марбут ба марди 52-солаи сокини ноҳия даромада, аз хазинааш 8 ҳазор сомонӣ ва 1 адад телефони мобилии тамғаи “Самсунг”-ро дуздидааст. Зарари расондашуда ба соҳибмулк 10 ҳазору 220 сомониро ташкил дода, феълан вобаста ба ин ҳолат тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 08.06.2022 №: 109 Мутолиа карданд: 2324