Раиси шаҳри Душанбе Рустами Эмомалӣ ноиби президенти Бонки аврупоии таҷдид ва рушд Марк Боуманро ба ҳузур пазируфт.  Меҳвари асосии вохӯриро масъалаҳои марбут ба ҳамкории дуҷониба оид ба рушди нақлиёти шаҳрӣ, татбиқи нақшаи шаҳри сабз, барномаҳои сармоягузорӣ ва афзоиши иқтидори шаҳр, фароҳамсозии шароит баҳри бунёди ояндаи беҳтару устувор барои шаҳри Душанбе ва сокинони он, сохтмони роҳу эстакадаҳо ва дигар самтҳои барои ҳар ду ҷониб муфид ташкил дод.

 

Тавре шуъбаи иттилооти дастгоҳи раиси шаҳр хабар дод, Рустами Эмомалӣ ва Марк Боуман, ҳамчунин, мавзуъҳои марбут ба ҳамкории Мақомоти иҷроияи ҳокимияти давлатии шаҳри Душанбе ва Бонки аврупоии таҷдид ва рушдро дар самти татбиқи босамари лоиҳаҳои нав баррасӣ карданд.

Ҷонибҳо қарор доданд, ки минбаъд низ ҳамкориҳои гуногунҷабҳаро дар соҳаҳои барои тарафайн мусоид идома дода, лоиҳаҳои нави муштаракро роҳандозӣ намоянд.

 

 

 

 

РАИСИ ШАҲРИ ДУШАНБЕ БО САФИРИ ҶОПОН МУЛОҚОТ КАРД

Раиси шаҳри Душанбе Рустами Эмомалӣ бо сафири фавқулода ва мухтори Ҷопон дар Ҷумҳурии Тоҷикистон Тосихиро Аики вохӯрд. Дар мулоқот ҳолати кунунӣ ва дурнамои муносибатҳои ҳамкорӣ миёни Мақомоти иҷроияи ҳокимияти давлатии шаҳри Душанбе ва Ҷопон мавриди музокирот қарор дода шуд.

Рустами Эмомалӣ Тосихиро Аикиро ба муносибати оғоз гардидани фаъолияти дипломатиаш дар Тоҷикистон таҳният гуфта, бо итминон иброз дошт, ки мавсуф бо талошу фаъолияти самарабахш ҷиҳати такони тоза бахшидан ба муносибатҳои шарикии кишварҳо дар арсаҳои гуногуни ҳамкорӣ саҳми арзанда хоҳад гузошт.

Ҷонибҳо манфиатдории худро ҷиҳати рушди ҳамкорӣ, аз ҷумла дар соҳаи тандурустӣ, маориф, сохтмони роҳу пулҳо, рақамикунонии самти обу корезӣ ва таъсиси корхонаҳои муштарак дар бахшҳои гуногун, таъкид намуданд.