Раиси шаҳри Душанбе Рустами Эмомалӣ Муассисаи таълимии томактабии хусусии «Cherry Kid’S Academy»-ро, ки дар кӯчаи Туниси пойтахт воқеъ аст, мавриди баҳрабардорӣ қарор дод. Раиси шаҳр бо бардоштани парда ба кори боғча оғоз бахшида, бо шароити фароҳамовардаи таълиму тарбия дар он шинос гардид.

Иттилоъ дода шуд, ки Муассисаи томактабии мазкур аз се ошёна иборат буда, барои ба таълиму тарбия фаро гирифтани 150 кӯдак дар 9 гурӯҳи синну соли гуногун пешбинӣ шудааст. Кӯдакистон дар масоҳати 0,24 гектар бо тарҳи замонавӣ сохта шуда, барои ҳар як гурӯҳи таълимӣ шароити муосири тарбия таъмин гардидааст. 

Таълиму тарбия дар кӯдакистон пурра ба забони англисӣ ба роҳ монда шуда, мутахассисони он дорои маълумоти олии касбӣ ва сертификати байналмилалии «Cambridge» мебошанд.

Ҳамчунин, раиси шаҳр дар кӯчаи Ломоносови ноҳияи Сино Муассисаи томактабии хусусии «Душанбе Монтессори»-ро мавриди баҳрабардорӣ қарор дод. Масоҳати умумии иншоот 1632 метри мураббаъро ташкил дода, аз се ошёна иборат аст ва барои ба таълиму тарбия фаро гирифтани 150 кӯдак пешбинӣ шудааст.

Дар Муассисаи нав омӯзиш бо забонҳои тоҷикӣ, русӣ ва англисӣ ба роҳ монда шуда, аз рӯи барномаи Мария Монтессори ба кӯдакон таълим дода мешавад.

Иншоот дорои ошхона бо 120 ҷойи нишаст, анбор барои нигоҳдории маводи хӯрокворӣ, ҷомашӯӣ, толори варзиш, толори фарҳангӣ, синфхонаҳои таълимӣ, аз ҷумла забони англисӣ, арифметикаи зеҳнӣ, толори мусиқӣ, толори машғулият, ҷойҳои хобу истироҳат, ҳуҷраҳои корӣ, маркази хизматрасонии тиббӣ, 4 синфхонаи таълимии ёрирасон барои зергурӯҳҳо - логопед, мусаввирӣ, мусиқӣ, равоншинос мебошад.

Дар ҳамин рӯз Рустами Эмомалӣ дар кӯчаи Саъдӣ Шерозӣ, шаҳраки 14, ноҳияи Сино гӯшаи мавсимии фурӯши маҳсулоти дастраси «Баҳор»-ро низ мавриди истифода қарор дод. Иншоот бо арзиши 8,85 миллион сомонӣ бунёд гардида, масоҳати умумии он 3700 метри мураббаъро ташкил медиҳад.

Дар гӯшаи мавсимӣ 4 нуқтаи фурӯш, 3 ҳуҷраи хизматрасонӣ бо айвони тарҳи замонавӣ бунёд гардида, бо шароити муосири савдо муҷаҳҳаз мебошад. Дар он 20 нафар бо кор таъмин мегардад.

 

Лашкар ШАРИФЗОДА, "Ҷумҳурият"