Хабарҳо
ФОРУМИ ҶАВОНОН ВА КӮДАКОН
Дар “Кохи Наврӯз” таҳти номи “Такон бахшидан ба амалҳо ва шарикӣ дар соҳаи об дар сатҳҳои маҳаллӣ, миллӣ, минтақавӣ ва ҷаҳонӣ” дар ҳошияи Конфронси дуюми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” Форуми ҷавонон ва кӯдакон оид ба масоили об баргузор шуд.
Тавре аз маркази матбуоти Вазорати маориф ва илм хабар доданд, дар Форуми мазкур Раҳим Саидзода, вазири маориф ва илм, Абдулло Раҳмонзода, раиси Кумитаи кор бо ҷавонон ва варзиш, Виргиниюс Синкявичюс, Комиссари Иттиҳоди Аврупо оид ба муҳити зист, уқёнусҳо ва моҳидорӣ, Осама Маккавӣ, намояндаи ЮНИСЕФ дар Тоҷикистон ва намояндагони ташкилоту идораҳо, инчунин, беш аз 200 ҷавонони фаъол аз 30 давлати дунё иштирок доштанд.
Раҳим Саидзода иброз дошт, ки мутобиқ ба қонунгузории умумибашарӣ ҳар як кӯдак ҳуқуқ ба таҳсили босифат, аз ҷумла ҳуқуқи дастрасӣ ба оби тозаи ошомиданӣ санитарӣ ва беҳдошт ҳангоми таҳсил дар муассисаҳои таълимиро соҳиб мебошад. Дастрасии мувофиқ ба оби тоза, санитарӣ ва беҳдошт дар муассисаҳои таълимӣ ҷузъи калидии муҳити бехатар, орӣ аз хушунату зӯроварӣ, фарогир ва самаранокии таълим барои ҳар як кӯдак ва наврас ба шумор меравад.
- Дар Ҷумҳурии Тоҷикистон солҳои 2022-2026 – солҳои рушди саноат эълон гардидааст, ки ин тадбири муҳими сиёсӣ ва дорои аҳамияти муҳими иқтисодӣ шароит фароҳам меорад, ки имкониятҳои инноватсионии ҷавононро дар соҳаи об тавассути пешниҳоди малакаҳои соҳибкорӣ ва омӯзиши онҳо васеъ гардонда, аз дидгоҳҳои тозаи онон дар самти дастгирӣ ба об ва аз миён бардоштани мушкилоти мавҷуда дар сайёра дар ин ҷода босамар истифода барем, - афзуд вазир.
Абдулло Раҳмонзода зикр кард, ки ҷавонон ҳамчун идомадиҳандаи сиёсати хирадмандонаи Президенти кишвар бояд дар ҳалли мушкилиҳои пешистода бетараф набошанд. Онҳо бояд дар ҳалли мушкилоти марбут ба об нақши муҳим бозанд. Насли ҷавон бояд бо тамоми малакаҳои зарурӣ барои бунёди ояндаи устувор муҷаҳҳаз бошад. Бахусус, сафарбар намудани ҷавонони кишварҳои олам барои амалҳои марбут ба об ва, ба ин васила, саҳм гузоштан барои ноил гардидан ба Ҳадафҳои Рушди Устувор то соли 2030, мусоидат ва ҷалби насли наврас ба идоракунии самараноки захираҳои об, омода намудани мутахассисони ҷавон дар самти рушди технологияи нав, тарбияи дипломатҳои ҷавон барои пешбурди ҳамкорӣ дар соҳаи об, шароит фароҳам овардан барои олимони ҷавон ва гузарондани тадқиқоти илмӣ дар соҳаи об аз масъалаҳое мебошанд, ки мо бояд дар ин самт фаъолият намоем.
Намояндаи ЮНИСЕФ дар Тоҷикистон гуфт, ки ҷавонон метавонанд барои ноил шудан ба ҳадафҳои бунёдии устувории об ва самаранокии захираҳо мусоидат кунанд. Аз ин рӯ, дар сурати рушди малака ва имкониятҳо, ҷавонон метавонанд дар пешбурди ҳуқуқи инсон ба об ва санитария барои ҳама неруи пешбаранда бошанд.
Дар охири Форум ҷавонон таъкид карданд, ки ин гуна воситаҳо бояд тавассути механизмҳои такмили иқтидори ҷавонон барои баланд бардоштани сатҳи донишҳои техникии онҳо дар бораи ин манбаи ҳаётан муҳим дастгирӣ карда шаванд.
З. РАҶАБ, “Ҷумҳурият”
Баёни ақида (0) Санаи нашр: №: Мутолиа карданд: 4859