2 майи соли 2022 тахминан соатҳои 10:30 ноболиғ Мавзуна Пирмуродова (санаи таввалудаш 22 июни соли 2015), сокини деҳаи Нурафшони шаҳри Левакант, ҳангоми идгардак аз беаҳамиятии волидон ба канали обгузари назди деҳаи Навободи шаҳр афтида, дар ҳолати ғарқшавӣ  қарор дошт. 

Ин ҳолатро дида кӯдакро аз дохили канал берун бароварда, сиҳату саломат ба падару модараш расондам ва ҳодисаро нақл кардам. Пас аз 10 рӯзи воқеа 13 майи соли 2022 дар масҷиди ҷомеи ба номи «Хоҷа Мастон»-и  шаҳри Левакант дар назди намозгузорон маро даъват намуда, аз номи сардори Раёсати Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар вилояти Хатлон полковник Ҷамшед Маҳмадзода Сипоснома тақдим карданд. Муфтии масҷид низ ин амаламро ситоиш намуд. 

Аз ин рӯ, мехоҳам арзи сипоси худро тариқи рӯзномаи «Ҷумҳурият», ки яке аз бонуфузтарин нашрияҳои Ҷумҳурии Тоҷикистон мебошад, ба Раёсати Кумитаи ҳолатҳои фавқулода ва мудофиаи гражданӣ дар вилояти Хатлон ва ба  бахши Раёсати Кумита дар шаҳри Левакант расонам. Зеро ин ниҳод пайваста бо мо доир ба ҳолатҳои фавқулода  корҳои фаҳмондадиҳӣ ва машғулиятҳо мегузаронад, ки наҷоти кӯдак натиҷаи ҳамин омӯзишҳо буд. 

Ашурмаҳмад ЮСУПОВ, сокини шаҳри Левакант