Пирӯзии калони Тоҷикистон бар Мянмар

 

Тими миллии Тоҷикистон оид ба футбол зери роҳбарии сармураббӣ Петр Сегрт дар бозии аввали марҳилаи интихобии Ҷоми Осиё – 2023 (гурӯҳи “F”) бар мунтахаби Мянмар ғолиб омад. 

Вохӯрӣ 8 июн дар варзишгоҳи ба номи Долон Омурзоқов (Бишкек, Қирғизистон) сурат гирифта, футболбозони тоҷик чор голи беҷавоб заданд. 

Тӯбҳоро Шервонӣ Мабатшоев (дақ.9, 58), Манучеҳр Ҷалилов (56, аз пеналти), Эҳсон Панҷшанбе (84) ба самар расонданд.

Мунтахаби мо дар даври навбатӣ бо Сингапур (11 июн) зӯр меозмояд. 

Марҳилаи интихобии Ҷоми Осиё – 2023 бо иштироки 24 даста дар шаш гурӯҳ баргузор гардида, ғолибони гурӯҳҳо ва 5 дастае, ки дар гурӯҳҳо бо натиҷаи беҳтар ҷои дуюмро ишғол кардаанд, ба даври финалӣ роҳхат мегиранд.

 

 

СУПЕРЛИГА

Футзалбозони "Равшан" дар садри ҷадваланд

 

Пас аз натиҷагирии ду даври Суперлигаи Тоҷикистон оид ба футзал тими “Равшан”-и Кӯлоб бо 6 хол дар садри ҷадвали мусобиқа мавқеъ дорад. 

Футзалбозони шаҳри Кӯлоб дар даври дуюм КМВА-ро шикаст доданд (6:5). 

Натиҷаи бозиҳои дигар: «Истаравшан» – «Пойтахт» – 5:2, «Соро компания» – «Самандар» – 15:1 ва «Сипар» – «Истиқлол» – 4:1. 

Дар даври сеюм «Сипар» бо «Истаравшан», «Самандар» бо «Истиқлол» (11 июн), «Равшан» бо «Соро компания» ва «Пойтахт» бо КМВА (12 июн) неру месанҷанд. 

 

 

ВАРЗИШИ САБУК

Дурахши давандаҳои тоҷик дар мусобиқоти байналмилалӣ

 

Варзишгарони тоҷик дар 4-умин мусобиқаи байналмилалӣ оид ба варзиши сабук ба хотираи Геннадий Арзуманов (4 – 5 июн, Тошкент, Ӯзбекистон) 12 медал (3 тилло, 5 нуқра, 4 биринҷӣ) гирифтанд.

Медалҳои тиллоро Илдар Аҳмадиев (дар масофаи 100 метр), Фаворис Музрапов (200 метр) ва Леонид Пронженко (400 метр) ба даст оварданд. 

Нишонҳои нуқра насиби Илдар Аҳмадиев (ҷаҳиш ба дарозӣ), Фаворис Музрапов (100 метр), Леонид Пронженко (110 метр бо монеаҳо), Муҳаммадризо Мирзозода (400 метр бо монеаҳо), Раҷабмо Абдуллоева (5000 метр) гаштанд. 

Раҷабмо Абдуллоева (10000 метр), Меҳробҷон Одинаев (10000 метр), Зикрилло Тӯрахонов (найзапартоӣ) ва  тими Тоҷикистон дар эстафетаи омехтаи 4х400 метр (3:40.59) барандаи зинаҳои сеюм гардиданд. 

 

Маҳмуд БАҲРОМ, 

шореҳи варзиш