Набудани оби нӯшоӣ, роҳ ва бунгоҳи тиббӣ мушкили асосии сокинони маҳаллаи Тутаки Ҷамоати шаҳраки Ховалинг ба ҳисоб меравад. Истиқоматкунандагони маҳаллаи мазкур (дар канори фурудгоҳ ҷойгир аст) мегӯянд, ки чанд сол аст, на об доранду на барқ. Иддаи онҳо аз идораи беҳдошти замин ва обёрии ноҳия барқ мегиранд.  Ба гуфтаи сокинон, онҳо борҳо ба Мақомоти иҷроияи маҳаллии ҳокимияти давлатии ноҳия муроҷиат карданд, вале касе ба додашон намерасад.

 

Як сокини маҳаллаи мазкур дар суҳбат ба хабарнигори рӯзнома гуфт:

- Наздики се моҳ буд барқ надоштем, вале ду рӯз пеш муваққатан барқ гирифтем. Обро бошад, гоҳ бо аробаю гоҳ бо мошин  меорем. Дуруст, ки бе об зиндагӣ кардан мушкил аст, вале чӣ илоҷ. 

Масъалаи дигари ҳалталаби маҳаллаи мазкур бартараф намудани симчӯбҳои фарсуда мебошад. Зеро пояҳо тамоман ба талабот ҷавобгӯ набуда, ҳоли ҳузнангез доранд. Баъзеи онҳо  аз шохаи дарахт сохта шуда, хавфи чаппа шуданашон аз эҳтимол дур нест. 

 Ҳусайнзода Файзулло, роҳбари дастгоҳи ноҳияи Ховалинг дар суҳбат афзуд:

- 40 дарсади истиқоматкунандагони маҳаллаи болозикр аз оби нӯшокӣ танқисӣ доранд. Аз барзиёдии буҷети маҳаллӣ барои маҳаллаи мазкур, то кунун маблағ пешбинӣ ва ҷудо нагардидааст.  

Номбурда иттилоъ дод, ки аз филиали шабакаҳои тақсимоти барқи шаҳри Кӯлоб барои таъмини трансформатор ва поя дархост кардаанд. Вале то кунун ҳеҷ натиҷае нест.

Судурзода Сайвалӣ, сардори шабакаҳои барқи ноҳия, дар суҳбат иброз намуд, ки маҳаллаи мазкур беш аз 2000 хоҷагӣ дорад. Ӯ гуфт, ки як   трансформатор насб мекунанд. Вале нагуфт, ки кай? 

Маврид ба зикр аст, ки аз соли 2010 дар маҳаллаи Тутак тақсимоти замини наздиҳавлигӣ оғоз гардида, то соли 2015 идома ёфтааст. Маҳаллаи фавқуззикр аз маркази ноҳия ҳамагӣ 2 – 3 километр дуртар ҷойгир мебошад. 

Суоли матраҳ  ин аст, ки оё Мақомоти иҷроияи маҳаллии ҳокимияти давлатии ноҳия тавони харидории як трансформатор ва чанд дона симчӯбро надорад? Бемасъулиятии масъулон то ба кай кашол меёфта бошад? 

“Ҷумҳурият” мавзуъро пайгирӣ хоҳад кард.

 

Суннати СОДИҚ, “Ҷумҳурият”