Мир24. СММ аз ислоҳоти сиёсӣ дар Қазоқистон пуштибонӣ мекунад. Дар ин бора муовини аввали Дабири кулли СММ Амина Муҳаммад изҳор дошт. Вай бо сафари расмӣ вориди Қазоқистон шуда, бо Президенти кишвар Қосим-Жомарт Токаев мулоқот намуд.  

Қазоқистон ва СММ ният доранд ҳамкориро дар самти таъмини амнияти озуқаворӣ, мубориза бо тағйирёбии иқлим, норасоии об, инчунин, рушди соҳаи маориф, ҳифзи ҳуқуқи занон ва кӯдакон идома диҳанд. Роҳбари Қазоқистон таъкид кард, ки дар замони буҳрон муттаҳид намудани талошҳо муҳим аст.

Амина Муҳаммад дар нишасти матбуотӣ гуфт: «СММ дастгирии худро аз Қазоқистон густариш медиҳад. Ислоҳоте, ки Президент дар низоми сиёсӣ оғоз кардааст, имкон медиҳад, ки пешрафтҳои бадастомада дар кишвар рушд ёбанд. Аз ин рӯ, Созмони байналмилалӣ омода аст, минбаъд низ, дар ҳалли мушкилоти таъхирнопазири кишвар саҳм гузорад».

 

 

 

Лавров бо ҳамтоёнаш аз СААД механизмҳои ҳамкорӣ дар шароити муосирро баррасӣ намуд

 

ТАСС. Имрӯз Сергей Лавров, вазири корҳои хориҷии Россия, дар ҷаласаи Шурои вазирони корҳои хориҷии кишварҳои узви Созмони Аҳдномаи амнияти дастаҷамъӣ (СААД), ки дар Ереван баргузор мешавад, ширкат меварзад.

Мария Захарова, намояндаи расмии ВКХ-и Россия, қаблан гуфта буд, ки ширкаткунандагони нишаст натоиҷи ҳамкориҳои бисёрҷониба дар чаҳорчӯбаи СААД ва дурнамои ҳамкориҳои минбаъдаро баррасӣ  менамоянд. Илова бар ин, вазирон ба ҳолати кунунии вазъияти байналмилалӣ ва минтақавӣ ва таъсири он ба амнияти кишварҳои узви ин Созмон, ҳамчунин, масъалаҳои такмили механизми вокуниш ба буҳрони СААД дахл хоҳанд кард.

 

 

 

Вазорати молияи ИМА: «Таҳримҳо алайҳи Россия ба худи ИМА зарба мезананд»

 

RT. Вазири молияи ИМА Ҷанет Йеллен эътироф кард, ки таҳримҳо алайҳи Россия боиси афзоиши қимати маводи ғизоӣ ва сӯзишворӣ дар бозори Амрико шудааст. Ба гуфтаи Йеллен, дар ояндаи наздик паст шудани қимати маводи сӯзишворӣ дар ИМА дар назар нест. Рушди иқтисоди Амрико ба далели ҳаводисе, ки дар ҷаҳон рух медиҳад, коҳиш хоҳад ёфт. Аммо аз таназзул набояд тарсид.

Пештар Йеллен гуфта буд, ки таваррум дар Иёлоти Муттаҳидаи Амрико бо вуҷуди чораҳои андешидаи маъмурияти Амрико дар сатҳи ғайри қобили қабул боқӣ мемонад.

 

 

 

Беларус ва Россия ҳамкориҳои минтақавиро густариш медиҳанд

Мир24. Беларус ва Россия ҳамкориҳои минтақавиро густариш хоҳанд дод. Дар ин бора дар мулоқот бо дипломатҳои рус раиси Комиссияи доимӣ оид ба корҳои байналмилалии Маҷлиси намояндагони Беларус Андрей Савиних изҳор дошт.

Ҳоло кишварҳо ба ивази воридот таваҷҷуҳ доранд. Беларус ба Россия маҳсулоти хӯрокворӣ, қисмҳои эҳтиётии мошину тракторҳо, мошинҳои кишоварзӣ содирот мекунад. Аммо иқтидори ҳамкориҳо тамом нашудааст. 

«Дар соҳаи саноат мо имсол ба рушди устувор ноил хоҳем шуд. Воқеан, мо ҳузури худро дар минтақаҳои Россия амиқтар карда истодаем ва минтақаҳои Россия робитаҳоро бо корхонаҳои мо тавсеа медиҳанд», - таъкид кард Андрей Савиних.