Ба муносибати Ҷашни 35 - солагии Истиқлоли давлатии Ҷумҳурии Тоҷикистон дар шаҳри Роғун сохтмону навсозии 105 иншооти гуногунсамт ба нақша гирифта шудааст. Аз ҷумла, дар маркази шаҳр 38, шаҳраки Оби Гарм 14, Ҷамоати деҳоти Қади об 43 ва дар Ҷамоати деҳоти Сичароғ 10 иншоот бунёд мешавад. Айни ҳол дар 40 иншоот корҳои сохтмонӣ ҷараён доранд.

Тавре аз Мақомоти иҷроияи ҳокимияти давлатии шаҳр ба рӯзномаи “Ҷумҳурият” хабар доданд, бо мақсади вусъати корҳои ободонӣ, саҳмгузорӣ дар амалҳои хайр, таъсиси корхонаву коргоҳҳои истеҳсолӣ ва рушди шаҳрдорӣ вохӯрии раиси шаҳр Сунъатулло Саидзода бо соҳибкорон баргузор гардид.

Раиси шаҳр зикр намуд, ки аз 105 иншооти сохташаванда 8 адади он аҳамияти ҷумҳуриявӣ дошта, аз ҳисоби буҷети ҷумҳуриявӣ бунёд мегардад. Инчунин, 78 иншоот аз ҷониби соҳибкорони маҳаллӣ ва 19 иншоот аз ҳисоби буҷети маҳаллию сармояи хориҷӣ сохта мешавад.

Дар вохӯрӣ соҳибкорон зикр намуданд, ки ба хотири рушди  соҳаҳои хоҷагии халқи шаҳр, ҳамчунин, пешрафти иқтисодиёти кишвар, бахусус ободу зебо гардондани як гӯшаи Ватан, саҳмгузор хоҳанд буд.

 

З. РАҶАБ, “Ҷумҳурият”