ҚАЛЛОБӢ

Парвандаи боз як “заминфурӯш” ба суд рафт

Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки парвандаи ҷиноятӣ нисбат ба Фирӯз Ҳасанов, сармутахассис (муҳандис - заминсоз)-и Ҷамоати шаҳраки Бохтариёни ноҳияи Кӯшониён, баъд аз анҷоми тафтиши пешакӣ бо тасдиқи фикри айбдоркунӣ ба суд ирсол гардид.

Тибқи иттилои маркази матбуоти агентӣ, номбурда бар асоси моддаҳои 247 қисми 4 банди “б” (қаллобие, ки ба миқдори махсусан калон содир шудааст) ва 3381 қисми 2 бандҳои “а,в” (ғайриқонунӣ додани қитъаи замин бо истифода аз ваколати мансабӣ) айбдор мешавад. Фирӯз Ҳасанов дар давоми фаъолияти кориаш дар мақоми муҳандис-заминсози Ҷамоати шаҳраки Бохтариён дар се ҳолат аз шаҳрвандон маблағи умумии 100 000 сомонӣ гирифта, ба онҳо ғайриқонунӣ қитъаҳои замин додааст.  

 

 

 

НАФС

Пули обунаро хӯрду ҷазо гирифт

Як корманди шуъбаи маорифи ноҳияи Абдураҳмони Ҷомӣ барои аз худ намудани маблағҳои обуна ба нашрияҳои даврӣ 18000 сомонӣ ҷарима ва аз ишғоли мансаби муайян маҳрум карда шуд.

Дар ин бора маркази матбуоти Прокуратураи генералӣ хабар дод. Бино ба иттилои манбаъ, Тӯйчӣ Маҳмадёров, мушовири кабинети методӣ оид ба фанҳои забон ва адабиёти тоҷики шуъбаи маорифи ноҳия, ҳамзамон масъули ташкили обуна ба нашрияҳои даврии шуъбаи маориф, бо истифода аз ваколатҳои мансабӣ 37241 сомонӣ маблағи обунаро аз худ намуда, ба манфиати шахсиаш истифода кардааст.

Вобаста ба ин ҳолат, прокуратураи ноҳия нисбат ба Т. Маҳмадёров бо моддаи 245 қисми 2 банди “г” Кодекси ҷиноятӣ (азонихудкунӣ ё исрофкорӣ бо истифода аз ваколати мансабӣ) парвандаи ҷиноятӣ оғоз намуда, бо ҳукми суди ноҳия нисбат ба ӯ ҷазо дар намуди ҷарима таъин шуд.

 

 

 

АВБОШӢ

Тафтиши амали марди кордбадаст

Кормандони мақомоти милитсияи ноҳияи Шоҳмансур аъмоли мардеро мавриди тафтишот қарор додаанд, ки сокини 24-солаи пойтахтро бо зарби корд захмӣ кардааст.

Тавре сомонаи Вазорати корҳои дохилӣ дар ин бора хабар дод, ҳодиса 9 июн дар кӯчаи Машъали пойтахт рух дода, марди кордбадаст, ки сокини ноҳияи Рӯдакӣ гуфта мешавад, бо корд ба қисмати дасти рости ҷабрдида задааст. Дар натиҷаи ин амал зани 24-сола ҷароҳати вазнини ҷисмонӣ бардошта, дар беморхона бистарӣ гаштааст. 

 

Шуъбаи ҳуқуқи рӯзномаи «Ҷумҳурият»